لاہور (نیوزڈیسک) پاکستان تحریک انصاف نے الزام عائد کیا ہے کہ ملک میں لاقانونیّت کا مکروہ کھیل جاری ہے اور نظامِ انصاف اپنی ساکھ برقرار رکھنے میں ناکام ہورہا ہے۔ تفصیلات کے مطابق زیرِ حراست قائدین کے مقدّمات میں طوالت کے معاملہ پر جاری اعلامیہ میں کہا گیا ہے کہ پاکستان تحریک انصاف کی جانب سے ڈاکٹر یاسمین راشد، سینیٹر اعجاز چوہدری، میاں محمود الرشید، عمر سرفراز چیمہ اور عالیہ حمزہ سمیت دیگر زیرِ حراست قائدین و کارکنان کو طویل عدالتی کارروائی کے ذریعے ریاستی عتاب کا نشانہ بنانے کی شدید مذمت کرتے ہیں، پاکستان تحریک انصاف کے سینئر قائدین اور کارکنان ملکی تاریخ کے بدترین سیاسی و ریاستی انتقام کی زد میں ہیں۔
ترجمان پی ٹی آئی کا کہنا ہے کہ گزشتہ پانچ ماہ سے ملک میں لاقانونیّت کا مکروہ کھیل جاری ہے اور نظامِ انصاف اپنی ساکھ تک برقرار رکھنے میں ناکام ہورہا ہے، تحریک انصاف کے زیرِ حراست قائدین میں سے اکثر کے چالان تک عدالتوں میں پیش نہیں کئے گئے نہ رسمی پیشیوں کے علاوہ ان کے مقدمات پر کارروائی آگے بڑھائی گئی ہے، جیل میں قید عمران خان کے ساتھیوں کو بنیادی آئینی حقوق اور انصاف سے محروم رکھنے کیلئے پراسیکیوشن اور عدلیہ کی ذیلی شاخوں کے مابین ایک اشتراک کا تاثر عوام میں پختہ ہورہا ہے۔



اعلامیہ میں مزید کہا گیا ہے کہ پراسیکیوشن تمام تر توانائیاں جھوٹے مقدمات قائم کرنے میں لگا رہی ہے، عدالتوں کی قابلِ ذکر اکثریت قانون و انصاف کے تقاضوں کو بالائے طاق رکھتے ہوئے ریاستی مشینری کے ہاتھوں میں کھلونا بنی ہوئی ہیں، نچلی عدالتوں میں جاری ظلم پر عدالتِ عظمیٰ کی خاموشی ملک میں لاقانونیّت کے فروغ اور حوصلہ افزائی کا سامان کر رہی ہے، عدلیہ شہریوں خصوصاً بےگناہ سیاسی کارکنان کیخلاف ریاستی وحشت کو خاموش جواز بخشنے کی بجائے ملک میں انصاف کا شیرازہ بکھرنے سے بچائے، تحریکِ انصاف کی تمام زیرِ حراست قائدین کا منصفانہ سماعت کا آئینی حق تسلیم کیا جائے اور ان کے مقدمات پر شفاف انداز میں کارروائی مکمل کرتے ہوئے انہیں ریاست کی عریاں وحشت سے نجات دلوائی جائے۔