لاہور (نیوزڈیسک) مسلم لیگ ن کے قائد نواز شریف کی وطن واپسی پر پاکستان تحریک انصاف کا ردِ عمل آگیا۔ تفصیلات کے مطابق ترجمان پی ٹی آئی نے ایک بیان میں کہا ہے کہ قومی مجرم کی وطن واپسی کیلئے آج ریاست نے شرم، حیا، قانون اور انصاف کو اپنے ہاتھوں سے دفن کردیا ہے، رجیم چینج سازش کے بعد آئین و جمہوریت بیزار ریاستی عناصر نے ملک و قوم کو آمریت کی زنجیروں میں جکڑ کر کرپٹ بھیڑیوں کے آگے پھینک دیا، مجرموں کی سرپرست یہی سوچ ہے جو 75 سال بعد بھی قوم کے پاؤں کی زنجیر اور ملک کی کسمپرسی، بیچارگی اور زوال کی بڑی وجہ ہے۔


تحریک انصاف کا موقف ہے کہ چیئرمین عمران خان نے آج سے 27 برس قبل جرم اور ریاست کے مابین اسی اشتراکِ بَد کےخلاف بے مثال سیاسی جدوجہد کا فیصلہ کیا، عمران خان کی قیادت میں آج قوم ملک کو سازش، طاقت اور چوروں، ٹھگوں، دھوکے بازوں اور بے حمیت مافیاز کے اشتراک سے فتح کرنے والی قوتوں کے سامنے شعور سے لیس ہوکر اپنے پورے قد سے کھڑی ہے، قوم ریاست کی جانب سے گود میں لیے گئے اپنے اس مجرم کے خاطر خواہ استقبال کیلئے تیار ہے۔

ترجمان پی ٹی آئی کا مزید کہنا ہے کہ قوم کو نسل در نسل لوٹنے والے جس مجرم کا احتساب کرنے میں عدالتیں ناکام رہیں اس کا محاسبہ عوام کریں گے، وہ باحمیّت قوم جس نے رجیم چینچ سازش کو بے پناہ وحشت و جبر کے باوجود قبول نہیں کیا وہ بدنامِ زمانہ لندن منصوبے اور اس کے شیطانی اہداف بھی قبول نہیں کرے گی، غیرسیاسی ترکیبوں اور غیراخلاقی و غیر جمہوری منصوبوں سے ظلم و جبر کے سلسلے کو دوام بخشنا ممکن نہیں، شفاف، آزادانہ اورمنصفانہ انتخابات کا فوری انعقاد ہی پاکستان کے مسائل کو حل کرسکتا ہے۔