لاہور (نیوزڈیسک) رہنما پی ٹی آئی علی محمد خان نے اپنے بیان میں کہا ہے کہ نوازشریف جہاں سے ریلیف لے کر گئے تھے جی بڑا کر کے وہیں جاتے۔ انہوں نے نجی ٹی وی چینل ہم نیوز کے پروگرام میں گفتگو کرتے ہوئے کہا کہ نوازشریف کا عدالت میں پیش نہ ہونے پر سوالات اٹھتے ہیں، نگران انتظامیہ نے آج نوازشریف کا استقبال کیا۔ پی ٹی آئی رہنما کاکہنا تھاکہ سارے لوگ 9مئی کی مذمت کرتے ہیں جنہوں نے کیا اچھا نہیں کیا، سپریم کورٹ پر حملہ کرنا بھی قابل مذمت تھا۔
علی محمد خان کا مزید کہنا تھاکہ کیا احسن اقبال ایگری کریں گے کہ سپریم کورٹ پر حملہ کرنے والوں کو بھی مائنس کیا جائے، مائنس کے چکر میں پڑیں گے تو ایسا نہ ہو کہ میاں صاحب ہی مائنس ہو جائیں۔ نوازشریف سزایافتہ اور مفرور تھے، نوازشریف آج جذباتی تھے، نواز شریف کیا پلان لے کر آئے ہیں؟ الیکشن صاف شفاف ہونا چاہئے۔

کیا آج کسی کو شک ہے کہ 2017میں نواز شریف کے ساتھ اچھا نہیں ہوا۔

ادھر پاکستان پیپلز پارٹی کے رہنما فیصل کریم کنڈی کا کہنا ہےکہ نواز شریف کو چاہیے تھا کہ الیکشن کی بات کرتے، لیکن انہوں نے نہیں کی، اگر آپ نے فیصلہ کرلیا ہے تو اعلان کردیں، الیکشن کرانےکی کیا ضرورت ہے۔ انہوں نے کہا کہ کہ پنجاب کی انتظامیہ نے نواز شریف کی مدد کی، مسلم لیگ ن نے آج قانون کی دھجیاں بکھیریں، آج غالباً تاج پوشی ہو رہی تھی، نواز شریف آج اپنی سی وی پیش کر رہے تھے،کیا کسی سیاسی جماعت کو ٹرین کے ڈبوں پر اس طرح سے پینٹنگ کی اجازت ہے؟ فیصل کریم کنڈی کا کہنا تھا کہ نواز شریف کو چاہیے تھا کہ الیکشن کی بات کرتے لیکن انہوں نےنہیں کی، نواز شریف کو یقین ہوتاکہ لوگ ان کو ووٹ دیں گے تو وہ الیکشن کی بات کرتے، ہم ہمیشہ کہتے ہیں کہ ہر ادارے کو اپنے دائرے میں رہ کر کام کرنا چاہیے، اگر آپ نے فیصلہ کرلیا ہے تو اعلان کردیں، الیکشن کرانےکی کیا ضرورت ہے۔
ان کا کہنا تھا کہ اس بار سلیکشن نہیں ہوسکتی، ووٹرکی اکثریت نوجوانوں کی ہے، جلسہ بھرنا الگ بات ہے، ووٹ بھرنا الگ، اس بار ووٹ پر ڈاکا نہیں ڈلےگا، اگر اس بار ووٹ پر ڈاکا ڈالا گیا تو انارکی پھیلےگی، فیصلہ عوام کو ووٹ کے ذریعےکرنا ہے، ن لیگ نے اپنا بیانیہ تبدیل کرلیا ہے، اس ملک میں میوزیکل چیئر کھیلی جاتی ہے، ن لیگ کل گلہ نہ کرے۔