کراچی (نیوزڈیسک) پیپلزپارٹی کے سینئر رہنما ناصر حسین شاہ نے بلاول کے 70 سال کے سیاستدانوں کو گھر بیٹھنے کے مشورے سے متعلق سوال کا جواب دیتے ہوئے کہا ہے کہ پیپلزپارٹی کے شریک چیئرمین آصف علی زرداری 68 سال کے ہیں، ابھی 70سال کے نہیں ہوئے۔ انہوں نے نجی ٹی وی چینل اے آر وائے نیوز کے پروگرام میں گفتگو کرتے ہوئے کہا کہ وزیراعظم نوجوان ہونا چاہیے جوغلط بات نہیں۔
ناصر حسین شاہ نے کہا کہ پیپلزپارٹی شروع سے ہی الیکشن کے لیےپوری تیار ہے۔ پی پی سندھ سوئپ کرے گی، جنوبی پنجاب سے نشستیں حاصل کریں گے۔ سینٹرل پنجاب مشکل ہے لیکن پی پی وہاں بھی مقابلہ کرے گی۔ پی پی رہنما نے کہا کہ بلاول بھٹو نے واضح کہا کہ نفرت کی سیاست اب نہیں ہوگی۔ بلاول نےکہا ہے الیکشن میں کسی سے اتحاد نہیں ہوگا۔

بلاول بھٹو وزیراعظم ہونگے تو ہم چاہیں گے مریم نواز کابینہ کا حصہ ہوں۔

انھوں نے کہا کہ پی پی کی حکومت بنی تو آئی پی پی سمیت دیگر کو ساتھ لےکرچلیں گے۔ اس وقت ملک کے لیے مشکل حالات ہیں سب کو مل کر چلنا ہوگا۔ پروگرام میں گفتگو کرتے ہوئے ان کا کہنا تھا کہ پاکستان تحریک انصاف کو بلے کے نشان کے ساتھ الیکشن میں آنا چاہیے۔ پی ٹی آئی بھی الیکشن میں موجود ہوگی تو پھر انتخابات پرسوال نہیں اٹھائے جائیں گے۔ انھوں نے کہا کہا 9 مئی واقعے کے ذمہ داروں سے کبھی اتحاد نہیں ہوسکتا۔ چیئرمین پی ٹی آئی کی نفرت کی سیاست کا نتیجہ ہم نے 9 مئی کو دیکھا۔ چیئرمین پی ٹی آئی نے جیل بھرو تحریک چلائی بعد میں کہا مجھے بچالو۔