کراچی (نیوزڈیسک) احتساب عدالت نے سابق مشیر پٹرولیم ڈاکٹرعاصم حسین اور دیگر ملزمان کی 462ارب روپے کے کرپشن ریفرنس میں حاضری سے استثنیٰ کی درخواست منظورکرلی ہے ۔تفصیلات کے مطابق کراچی کی احتساب عدالت کے روبرو سابق مشیر پیٹرولیم ڈاکٹر عاصم حسین و دیگر کے خلاف 462 ارب روپے کی کرپشن سے متعلق ریفرنس کی سماعت ہوئی۔

ڈاکٹر عاصم حسین سمیت چار ملزمان کی جانب سے حاضری سے استثنیٰ کی درخواست دائر کردی۔ ملزمان صفدر، اطہر حسین، اعجاز چوہدری کی جانب سے بھی حاضری سے استثنیٰ کی درخواست دائر کی گئی ہے۔ عدالت نے چاروں ملزمان کی حاضری سے استثنیٰ کی درخواست منظور کرتے ہوئے سماعت 10 جنوری تک ملتوی کردی۔ نیب کے مطابق ملزمان پر قومی خزانے کو 462 ارب روپے کا نقصان پہنچانے کا الزام ہے۔