اسلام آباد (نیوزڈیسک) احتساب عدالت اسلام آباد نے سابق صدر مملکت آصف علی زرداری، سابق وزرائے اعظم نواز شریف اور یوسف رضا گیلانی سمیت دیگر ملزمان کے خلاف توشہ خانہ سے قیمتی گاڑیاں اور تحائف وصول کرنے سے متعلق ریفرنس میں نیب سے 4 جنوری تک رپورٹ طلب کرلی۔آصف علی زرداری، نواز شریف اور یوسف رضا گیلانی سمیت دیگر ملزمان کے خلاف احتساب عدالت کے جج محمد بشیر نے سماعت کی۔
نواز شریف کے وکیل قاضی مصباح نے کہا کہ قاضی مصباح برآمدگی کا نوٹس کردیں آئندہ سماعت پر دیکھ لیں ، چھ متفرق درخواستیں ہیں ان کو بھی سن لیں ، نواز شریف شامل تفتیش ہوگئے ہیں، تفتیش کی روشنی میں نیب نے آج رپورٹ جمع کروانی تھی۔نیب پراسکیوٹر نے کہا کہ ابھی تفتیشی افسر کو رپورٹ جمع کروانے کے لیے وقت درکار ہے، تفتیشی افسر کا تبادلہ ہوگیا تھا ڈائریکٹر بھی تبدیل ہوئے ہیں۔

سابق وزیر اعظم یوسف رضا گیلانی نے حاضری سے استثنیٰ مانگ لیا، وہ انتخابی مہم میں ہونے کی وجہ سے پیش نہ ہوئے، نیب پراسکیوٹر نے کہا کہ آئندہ سماعت پر تفتیشی افسر آجائیں گے، آئندہ سماعت پر رپورٹ جمع کروادیں گے۔عدالت نے کہا کہ آپ چار دن میں جواب جمع کروا دیں، نیب پراسکیوٹر نے کہا کہ چار دن رپورٹ جمع کروانے کے لیے کافی نہیں ہیں۔احتساب عدالت نے چار جنوری تک نیب سے رپورٹ طلب کرتے ہوئے سماعت ملتوی کردی۔