راولپنڈی (نیوزڈیسک) آرمی چیف جنرل سید عاصم منیر نے کہا ہے کہ ہمیں ایک پر عزم اور مضبوط قوم کے طور پر متحد اور یکجان ہونا پڑے گا۔ پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے راولپنڈی میں کرائسٹ چرچ میں کرسمس کی تقریبات میں شرکت کی، اس موقع پر انہوں نے پاکستان میں مقیم تمام مسیحی برادری کو کرسمس کی مبارکباد دی، مذہبی برادری کے لیے احترام کا اظہار کیا، کرسچن کمیونٹی نے آرمی چیف کا خیرمقدم کیا اور تہوار بانٹنے پر ان کا شکریہ ادا کیا۔
آئی ایس پی آر نے بتایا ہے کہ اس موقع پر آرمی چیف نے متحد و ترقی پسند پاکستان کے لئے قائد کے حقیقی وژن پر عمل کرنے کے لیے معاشرے میں بین المذاہب ہم آہنگی کو فروغ دینے کی ضرورت پر زور دیا، آرمی چیف نے درپیش چیلنجز اور مسائل سے نمٹنے کے لیے بیان بازی اور پروپیگنڈہ کے بجائے قومی مسائل کے بارے میں درست نقطہ نظر، سچائی اور علم پر مبنی رائے رکھنے کی اہمیت پر بھی زور دیا۔

جنرل عاصم منیر نے کہا کہ اسلام ہمیں امن، دوستی کا سبق سکھاتا ہے اور بین المذاہب ہم آہنگی کی حوصلہ افزائی کرتا ہے جو کہ وقت کی اہم ضرورت ہے، کیوں کہ پاکستان کے دشمن مذہبی، نسلی اور سیاسی کمزوریوں کو استعمال کرتے ہوئے دراڑیں ڈالنے پر تلے ہوئے ہیں، ہمیں ایک پْرعزم اور مضبوط قوم کے طور پر اْبھرنے کے لیے متحد اور یکجان ہونا پڑے گا۔
آئی ایس پی آر کا کہنا ہے کہ آرمی چیف نے قائد اعظم محمد علی جناح کے 147ویں یوم پیدائش پر اْن کے عظیم وژن اور قیادت کو شاندار خراج تحسین پیش کرتے ہوئے 11 اگست 1947ء کو دستور ساز اسمبلی سے خطاب کے دوران قائد کے تاریخی کلمات کا حوالہ دیا کہ "آپ آزاد ہیں، آپ اپنے مندروں میں جانے کے لیے آزاد ہیں، آپ اس ریاست پاکستان میں اپنی مساجد یا کسی دوسری عبادت گاہ میں جانے کے لیے آزاد ہیں"، آخر میں آرمی چیف نے تمام شعبوں اور ڈومینز میں پاکستان کی پوری مسیحی برادری کی خدمات اور قربانیوں کا بھی اعتراف کیا۔