لاہور (نیوزڈیسک) پاکستان مسلم لیگ (ن) کے صدر وسابق وزیراعظم شہباز شریف نے ایران کی جانب سے پاکستانی حدود کی خلاف ورزی پر شدید تشویش کا اظہار کیا ہے۔سماجی رابطے کی ویب سائٹ پر اپنے پیغام میں شہباز شریف نے لکھا کہ ایران کی جانب سے پاکستان کی سرحدی حدود کی خلاف ورزی سے دھچکا لگا۔میزائل حملہ دوستی اور ہمسائیگ کے اصولوں کے خلاف ہے۔
میزائل حملے سے دونوں ممالک کے تاریخی تعلقات کو نقصان ہوگا۔

اپنے پیغام انہوں نے دونوں ممالک کے درمیان مخلصانہ بات چیت اور باہمی تعاون کی ضرورت کو ناگزیر قرار دیا۔شہباز شریف نے ایرانی میزائل حملے میں جاں بحق ہونے والوں کے لواحقین سے اظہار تعزیت بھی کیا۔واضح رہے کہ دفتر خارجہ نے ایران کی جانب سے پاکستان کی فضائی حدود کی خلاف ورزی کی شدید مذمت کرتے ہوئے ایرانی ناظم الامور کو وزارت خارجہ میں طلب کیا تھا۔دفتر خارجہ کا کہنا تھا کہ پاکستان کی خودمختاری کی یہ خلاف ورزی مکمل طور پر ناقابل قبول ہے اور اس کے سنگین نتائج نکل سکتے ہیں جس کی ذمہ داری ایران پر ہی عائد ہوگی۔