لاہور(نیوزڈیسک) آئی جی پنجاب پولیس ڈاکٹر عثمان انور کا کہنا ہے کہ پنجاب پولیس نے بین الصوبائی سرحدی علاقے سے دہشت گردوں کی پنجاب میں داخلے کی کوشش ناکام بنا دی۔ ڈاکٹر عثمان انور نے جھنگی چیک پوسٹ پر حملہ اور پولیس رسپانس کے حوالے سے واقعے کی تفصیلات بیان کرتے ہوئے کہا کہ سرحدی چوکی جھنگی پر دہشت گردوں نے رات کی تاریکی کا فائدہ اٹھا کر حملہ کی کوشش کی، جسے ناکام بنا دیا گیا۔
آئی جی پنجاب کے مطابق بھرپور فائرنگ سے دہشت گردوں کو پسپائی اور بھاگنے پر مجبور کر دیا۔کہ ایس ایچ او وہوا کی قیادت میں دوسری ٹیم بھی بیک اپ کیلئے فوری موقع پر پہنچی۔ بہادر جوانوں نے جدید ترین تھرمل امیج کیمروں کی مدد سے دہشت گردوں کی نشاندہی کی، جس کے بعد پولیس کے جانبازوں نے بروقت کارروائی کی۔

ان کا مزید کہنا تھا کہ دہشت گردوں اور سفاک مجرمان کو کسی صورت صوبہ میں داخل نہیں ہونے دیا جائے گا اور دہشت گردوں کا ہر حملہ ناکام بنایا جائے گا۔

صوبے کی تمام سرحدی چوکیوں پر پولیس ٹیمیں شب و روز ہائی الرٹ ہوکر فرائض ادا کر رہی ہیں، شہریوں کی جان و مال کے دشمن خطرناک دہشت گردوں کے خاتمے کیلئے پولیس پوری طرح تیار ہے۔ آئی جی پنجاب کا مزید کہنا تھا کہ ہم پوری طرح الرٹ اور چوکنا ہیں ۔صوبے میں انتخابات کیلئے امن و امان اور حالات سازگار ہیں۔ الیکشن میں امن و امان کی صورتحال کیلئے ہم نے ورکنگ پلان بنا لیا ہوا ہے اور صوبے بھر میں جاری انتخابی جلسے اور جلوسوں کی سخت مانیٹرنگ کی جارہی ہے اور پولیس کے جوان پوری سیکورٹی فراہم کررہے ہیں ۔کسی بھی ممکنہ خطرے سے نمٹنے کیلئے ہم پوری طرح الرٹ ہیں ۔ سماج دشمن کارروائیوں کا منہ تو ڑ جواب دینگے ۔ ہماری اولین ترجیح ہے کہ الیکشن کا انعقاد پرامن ہو۔