کراچی (نیوزڈیسک) گورنر سندھ کامران ٹیسوری نے کرایہ داروں کو مفت پلاٹ دینے کی خوشخبری سُناتے ہوئے کہا ہے کہ 30 سال سے کراچی میں کرائے پر رہنے والوں کو 80 اور 120 گز کے مفٹ پلاٹ دیئے جائیں گے، پہلے مرحلے میں 600 کرایہ داروں کو مفت پلاٹ دیں گے، جس کے لیے کراچی اور سندھ میں مختلف ہاؤسنگ سوسائٹی والوں سے بات کرلی ہے۔
گلستان جوہر کراچی میں میڈیا سے گفتگو کرتے ہوئے انہوں نے کہا کہ میرے صوبے کے نوجوان پریشان ہیں، پڑھے لکھے لوگ رائیڈر بنے ہوئے ہیں، 16 سال پڑھ کر بھی بیروزگاری ہے، حکومت کو چاہیئے ان کو روزگار دے، ہیلتھ پر کام ہوگیا ہے چیف منسٹر کے دستخط درکار ہیں، ایک دستخط پر کراچی میں لوگ 10 لاکھ روپے کا مفت علاج کرانے کے مستحق ہو جائیں گے، اگر دستخط نہ ہوئے تو لوگ آخرت میں ان سے پوچھیں گے۔

کامران ٹیسوری کا کہنا ہے کہ اگر چوری ہوگئی تو میں گورنر شپ سے استعفیٰ دینے کو تیار ہوں، جس کی موٹر سائیکل چھن جائے گورنر ہاؤس اس کو فراہم کرے گا، ہر مرتبہ تین تین ماہ موٹر سائیکل دینے کیلئے بڑھاتے رہیں گے، پہلے مرحلے میں ایک ہزار 700 موٹر سائیکل چوری ہونے والے متاثرین کو فراہم کی جائیں گی۔ انہوں نے کہا کہ روزانہ کی طرح آج بھی جوہر کی مارکیٹوں کی دعوت پر میں آیا ہوں، جب مارکیٹ میں گیا ہوں تو عوام نے حیران کیا جنہوں نے بتایا کہ 22 سال ہوگئے مارکیٹ بنے آپ پہلے حکومتی نمائندے ہیں جنہوں نے خیریت دریافت کی، کہیں پانی نہیں، کہیں بجلی نہیں یہاں کے عوام اپنے خاندان کا روزگار بنا رہے ہیں، جوہر کی عوام نے اپنے صوبے کے گورنر سے مل کر خوشی کا اظہار کیا، بہت ساری مارکیٹوں میں آگ لگی کوئی پوچھنے نہیں آیا لیکن میرا عوام سے یہ وعدہ ہے میں خود چل کر عوامی مسائل حل کروں گا۔