لاہور(نیوزڈیسک) پاکستان مسلم لیگ ن کے سینئر رہنماءخواجہ آصف نے بانی پی ٹی آئی عمران خان کو سائفر کیس میں 10سال سزا سنائے جانے پر اپنے ردعمل میں کہا ہے کہ ریاست کے سیکرٹس کو سیاسی مقاصد کیلئے استعمال نہیں کیا جاسکتا،قانون اس معاملے پر حرکت میں آیا ہے۔میڈیا سے گفتگو کرتے ہوئے خواجہ آصف کا مزید کہنا تھا کہ عدالت نے کارروائی سب کے سامنے اوپن کی ہے ،یہ عدالتی فیصلہ ہے سب کو اس کا احترام کرنا چاہئے۔
عمران خان اب سب کے سامنے ایکسپوز ہوگئے ہیں۔موجودہ انتخابات میں اس فیصلے پر ہونے والے اثرات کے جواب میں خواجہ آصف نے کہا کہ اس فیصلے کے اثرات لازمی طوراس الیکشن میں پڑیں گے۔اور عوام کو اب پتہ لگ گیا ہے کہ عمران خان نے سائفر کو اپنی سیاسی مقاصد کیلئے استعمال کیا ہے ۔

دولت و اقتدار کی ہوس آپ کو لے ڈوبتی ہے۔اقتدار صرف اللہ کی ذات کے پاس ہمیشہ رہنے والی چیز ہے۔

ہم سیاستدان اقتدار میں آنے کے بعداس چیز کو بھول جاتے ہیں ۔سائفر کی اہمیت کے حوالے سے ان کا کہنا تھا کہ وزارت خارجہ میں روزانہ کی بنیاد پر سائفر آتے رہتے ہیں اور انہیں ایک فولڈر میں لگا کر وزیر خارجہ کو دکھایا جاتا ہے اس کے بعد اسے وزیراعظم کو بھجوادیا جاتاہے ۔وزیراعظم بھی اس کو دیکھنے کے بعد واپس وزارت خارجہ کو بھجوا دیتا ہے۔وزیراعظم ان کو اپنے پاس نہیں رکھ سکتے۔
توشہ خانہ اور 190ملین پاﺅنڈ اور گھڑی چور ی کے واقعات اب عوام سب کے سامنے آ گئے ہیں ۔واضح رہے کہ آج سائفر کیس کی خصوصی عدالت میں سماعت ہوئی،خصوصی عدالت کے جج ابو الحسنات ذوالقرنین نے اڈیالہ جیل میں بانی پی ٹی آئی عمران خان اور شاہ محمود قریشی کے خلاف سائفر کیس کی سماعت کی اس سلسلے میں عمران خان اور شاہ محمود عدالت میں موجود تھے۔سماعت کے بعد بانی پی ٹی آئی عمران خان اور شاہ محمود قریشی کو 10،10 سال قید کی سزا سنادی۔
سماعت کے دوران جج نے کہا کہ آپ کے وکلا حاضر نہیں ہورہے ،آپ کو اسٹیٹ ڈیفنس کونسل فراہم کی گئی، اس پر وکلا صفائی نے کہا کہ ہم جرح کرلیتے ہیں۔جج ابو الحسنات نے کیس کا مختصر زبانی فیصلہ سنایا۔واضح رہے کہ اس سے قبل عمران خان نے سائفر کیس میں سرکاری وکلا صفائی کی تقرری کو اسلام آباد ہائیکورٹ میں چیلنج کیا تھا۔