اسلام آباد(نیوزڈیسک) صدر مملکت آصف علی زرداری نے لاہور میں کیپٹن محمد علی قریشی شہید کے گھر کا دورہ کیا اور کیپٹن محمد علی قریشی شہید کے لواحقین کے ساتھ اظہارِ تعزیت کیا۔کیپٹن محمد علی قریشی گزشتہ دنوں بلوچستان میں شہید ہوئے تھے ۔صدر مملکت نے کیپٹن محمد علی قریشی شہید کیلئے فاتحہ خوانی کی ۔

صدر مملکت کا کیپٹن محمد علی قریشی کی خدمات اور بہادری کو خراجِ عقیدت پیش کیا اور کہا کہ مُشکل کی اس گھڑی میں ہمدردیاں شہید کے اہل خانہ کے ساتھ ہیں،دہشت گردی کے خلاف جنگ میں بہت سے نوجوانوں نے جانوں کا نذرانہ پیش کیا۔

صدر مملکت نے کہا کہ شہید محترمہ بے نظیر بھٹو بھی دہشت گردی کے خلاف جنگ میں شہید ہوئی،دہشت گردی کے فتنے کو جڑ سے اکھاڑنے کیلئے آخری دم تک کوششیں جاری رکھیں گے۔صدر مملکت نے شہید کیپٹن کے اہلِ خانہ کے جذبہ حب الوطنی اور ایثار کو سراہااورکہا کہ قوم شہداء اور انکے خاندانوں کی قربانیوں کو ہمیشہ یاد رکھے گی۔صدر مملکت نے کیپٹن محمد علی قریشی کیلئے بلندی درجات، ورثاء کیلئے صبر جمیل کی دعاکی۔