راولپنڈی(نیوزڈیسک) بانی پی ٹی آئی عمران خان نے کہا ہے کہ نیب ترامیم آئین کے خلاف ہیں اور تباہی کا راستہ ہے، نیب ترامیم کے ذریعے انھوں نے خود کو بڑی چھوٹ دے دی ہے، قانون سے بالاتر لوگ ہمیشہ بچ جاتے ہیں،منی لانڈرنگ کو کھلی چھوٹ دے دی گئی اب اسے کوئی نہیں روک سکتا، راولپنڈی کی اڈیالہ جیل میں صحافیوں سے گفتگو کرتے ہوئے بانی پی ٹی آئی کا مزید کہنا تھا کہ سپریم جوڈیشل کونسل کے ماتحت کرکے نیب کو خود مختار، آزاد ادارہ بنایا جائے۔
اپنی چوریاں معاف کروا کر قوم کو کہا جارہا ہے قربانیاں دو۔ چھوٹی سی اشرافیہ نے اربوں کے کیس معاف کروا لئے ہیں نیب ترامیم آئین کے بھی خلاف ہیں۔ دنیا کی کسی پارلیمنٹ میں ایسا نہیں ہوا کہ قانون پاس کروا کر چوری معاف کروائی گئی ہو۔

ملک اشرافیہ کے قبضے میں ہے۔عمران خان کا کہنا تھا کہ آرمی چیف نے نفرتیں کم کرنے کا بیان دیا۔مودبانہ بات کرتا ہوں کہ نفرتیں آپ کی وجہ سے ہیں۔

نفرت تو آپ کی طرف سے کم ہونی چاہیے۔چوری کرنی ہے تو عاصم منیر اور سٹیبلشمنٹ کے ساتھ مل جائیں اور جو مرضی کریں۔ ان کے ساتھ مل جائیں تو سارے کیسز ختم؟ یہ انصاف تو نہیں ہے۔ اس ملک کو ڈنڈے کی نہیں انصاف کی ضرورت ہے۔ ہم بھیڑ بکریاں نہیں انسان ہیں انصاف ہوتا ہے تو امن آتا ہے۔گفتگو کے دوران بانی پی ٹی آئی عمران خان کا مزید کہنا تھا کہ22 اگست کا جلسہ منسوخ کرنے کیلئے منتیں کی گئی تھیں۔
8 ستمبر کو جلسہ کرنے کی یقین دہانی کروائی گئی مگر اب اس میں بھی رکاوٹیں کھڑی کی جا رہی ہیں۔ پی ٹی آئی کو کہتا ہوں کہ حقیقی ازادی کیلئے نکلنا ہے۔ آزادی انصاف سے آتی ہے۔ ساری قوم 8ستمبر کو باہر نکلے۔ کہتا ہوں کہ آٹھ ستمبر کو عوام نکلے یہ حقیقی ازادی کی جنگ ہے۔آزادی انصاف سے آتی ہے اس کیلئے قوم باہر آئے۔انہوں نے کہا کہ نیب کو خود مختار ادارہ بنانا چاہتے ہیں اور یہ بھی چاہتے ہیں کہ نیب کا بھی احتساب ہو۔
سکاٹ لینڈ یارڈ میں وائٹ کالر کرائم کیلئے فراڈ اسکواڈ، برطانیہ میں نیشنل آڈٹ کمیشن موجود ہے جو وائٹ کالر کرائم پکڑتے پیں۔منی لانڈرنگ کو کھلی چھوٹ دے دی گئی اب اسے کوئی نہیں روک سکتا۔ محسن نقوی کے پانچ ملین ڈالر بیرون ملک پڑے ہیں۔مریم نواز چار مےفیئر فلیٹس کی مالکن ہے۔ حسن نواز نے ٹی وی پر بھی تسلیم کیا۔ شہباز شریف کے 5 اورآصف علی زرداری کے 8 ریفرنس ختم ہوئے۔
فریال تالپور کی دبئی لیکس میں 5 جائیدادیں سامنے آئیں۔ نیب ترامیم کے ذریعے وائٹ کالر کرائم کو این آر او دے دیا گیا ہے۔عمران خان نے کہا کہ نیب نے 1999ءسے 2017ءتک صرف 290 ارب روپے اکٹھے کئے اور ہمارے ساڑھے 3 سال میں نیب نے 480 ارب روپے اکٹھے کئے گئے۔ ہمارے دور حکومت میں نیب نے ابھی مزید 1100 ارب روپے اکٹھے کرنے تھے گزشتہ ایک سال میں نیب نے صرف ڈیڑھ کروڑ روپے اکٹھے کئے اپنی چوریاں معاف کروا کر قوم کو کہا جاتا ہے کہ قربانیاں دو۔
یہاں اڈیالہ جیل میں سیکڑوں قیدی 50 ہزار روپے سے ایک لاکھ روپے تک کے مچلکے اور جرمانے جمع نہ کروائے جانے کے باعث قید ہیں۔میں نے نیب کے کسی تفتیشی آفیسر کو دھمکی نہیں دی میں نے کہا تھا کہ چیئرمین نیب، تفتیشی افیسر، وعدہ معاف گواہوں پر کیس کروں گا تاکہ یہ آئندہ لوگوں کو انتقام کا نشانہ نہ بناسکیں۔ میں نیب کے خلاف عدالت جانا چاہتا ہوں تاکہ نیب کے لوگوں کو بھی خوف ہو۔
نواز شریف کے ساتھ لندن ایگریمنٹ کے بعد پی ٹی آئی پر ظلم کیا گیا۔ کوئی بتائے میری بیوی کا کیا قصور ہے کہ 7 ماہ سے جیل میں ہے؟ اس وقت نیب جنرل عاصم منیر کے ماتحت ہے، میرا اس ملک میں جینا مرنا ہے باہر نہیں جاوں گا۔ اشرافیہ میں سے کس کی پراپرٹی یا پیسہ باہر نہیں ؟ انہوں نے باہر بھاگ جانا ہے یہ نہ بتائیں فلاں کا پیسہ باہر ہے۔