اسلام آباد (نیوزڈیسک) وزیراعظم شہباز شریف نے سعودی عرب کے قومی دن پر مبارکباد دیتے ہوئے کہا ہے کہ شاہ سلمان بن عبد العزیز اور شہزادہ محمد بن سلمان کی قیادت میں سعودی عرب اکیسویں صدی کے عظیم ملک کی حیثیت سے اُبھرا ہے۔ وزیراعظم آفس سے جاری بیان کے مطابق شہباز شریف نے اپنے پیغام میں کہا کہ سعودی عرب کا وژن 2030ء دنیا بھر کے لیے مثالی نمونہ ہے، آج کے دور میں سعودی عرب کاروبار، ٹیکنالوجی، معیشت اور دیگر شعبوں میں ترقی پزیر ممالک کی مثالی قیادت کر رہا ہے، پاکستان کی معیشت کے حالیہ استحکام میں سعودی عرب کے تعاون کے لیے پوری قوم مشکور ہے۔
اسی طرح وزیر داخلہ محسن نقوی نے شاہ سلمان بن عبدالعزیز، ولی عہد محمد بن سلمان، شاہی خاندان اور سعودی عرب کے عوام کو دل کی اتھاہ گہرائیوں سے نیک خواہشات اور خیرسگالی کا پیغام دیا، ان کا کہنا ہے کہ پاکستان اور سعودی عرب کے سفارتی تعلقات، دوستی، محبت اور بھائی چارے کی اعلیٰ مثال ہے، حجاز مقدس مسلمانوں کی عقیدت کا محور اور روحانیت کا بنیادی مرکز ہے، پاکستان اور سعودی عرب کے عوام مذہبی اور برادرانہ رشتوں سے جڑے ہوئے ہیں، سعودی عرب نے پاکستان کا ہمیشہ مشکل وقت میں ساتھ دیا، حالیہ قیادت کی سربراہی میں سعودی عرب نے ترقی کی نئی منازل طے کی ہیں، اسلام اور مسلمانوں کی خدمت کے لیے سعودی عرب کے شاہی خاندان کی خدمات کو فراموش نہیں کیا جا سکتا، پاکستان اور سعودی عرب کے مابین گہرے اور دیرینہ تعلقات ہمیشہ قائم و دائم رہیں گے۔

علاوہ ازیں قومی اسمبلی کے سپیکر ایاز صادق نے سعودی عرب کے قومی دن پر خادم الحرمین الشریفین شاہ سلمان بن عبدالعزیز، ولی عہد محمد بن سلمان اور سعودی عوام کو مبارکباد پیش کی اور کہا کہ آج کا دن سعودی عرب کی تاریخ کا ایک یادگار دن ہے، سعودی عرب نے قلیل عرصے میں ترقی اور استحکام کے سفر میں نمایاں منازل طے کی ہیں، پاکستان اور سعودی عرب کے مابین تاریخی برادرانہ تعلقات باہمی اعتماد اور اسلامی بھائی چارے پر مبنی ہیں، پاکستان کی عوام سعودی عرب کے ساتھ گہری وابستگی رکھتے ہیں، پاکستان سعودی عرب کی خوشیوں میں برابر کا شریک ہے، دونوں برادر ممالک کی عوام کے دل ایک ساتھ دھڑکتے ہیں، دونوں برادر ممالک نے ہمیشہ ہر مشکل وقت میں ایک دوسرے کا ساتھ دیا ہے، سعودی عرب اور پاکستان کے لازوال رشتہ کے دوام کے لیے دعاگو ہوں۔