کراچی (نیوزڈیسک) معروف اسلامی سکالر ڈاکٹر ذاکر نائیک نے وفاقی دارالحکومت کی تقریب کے دوران سٹیج چھوڑنے پر تنقید کا جواب دے دیا۔ سندھ گورنر ہاؤس کراچی میں عوامی نشست سے خطاب کرتے ہوئے انہوں نے کہا کہ مجھے یتیم بچوں سے ملاقات کے لیے بلایا گیا جس پر میں نے انتہائی وقت کی کمی کے باوجود صرف 10 منٹ کے لیے شرکت کی حامی بھری لیکن تقریب میں یتیم بچے تو پیچھے رہ گئے آگے صرف فوٹو سیشن چلتا رہا، پھر مجھ سے تقریر کرنے کا کہا گیا تو میں نے بچوں کی خاطر کچھ دیر گفتگو کی لیکن تقریر کے اختتام پر خواتین کو سٹیج پر بلالیا گیا وہ سب بالغ تھیں اس لیے میں انہیں خواتین ہی کہوں گا۔
ڈاکٹر ذاکر نائیک نے بتایا کہ میں نے اعتراض کیا تو تقریب کے کارکن نے کہا کہ ’یہ سب بچیاں ہیں‘، میں نے کہا کہ ’یہ کہاں کا تصور ہے، میری مذہبی تقریر کے دوران لڑکیوں کی پوری فوج سٹیج پر آگئی، جو 15 سے 16 سال تک کی بالغ لڑکیاں تھیں، بالغ ہونے پر کسی لڑکی کو نہیں چھو سکتے لیکن اس تقریب کے بعد میرے سٹیج سے اترنے پر لوگوں نے مجھ پر تنقید کرنی شروع کردی جس پر مجھے بہت حیرانی ہوئی کہ پاکستان میں یہ کیا ہورہا ہے، کیا ہوگیا ہے اس ملک کو، آپ کو تو یہ بولنا چاہیئے تھا ماشاءاللہ کیا داعی ہے سٹیج سے نیچے اتر گیا مگر الٹا لوگ مجھے کہہ رہے تھے کہ میں لڑکیوں سے نہیں ملا۔

معروف سکالر کا کہنا ہے کہ یتیم خانے کے مالک نے کہا ’یہ میری بیٹیاں ہیں‘، میں نے کہا ’تمہیں بھی ان بچیوں کو چھونا حرام ہے، یہ کہاں کا معاشرہ ہے، بیٹی بولنے میں کوئی مضائقہ نہیں لیکن نابالغ نامحرم کو چھو بھی نہیں سکتے، بیٹی بولنے میں کوئی حرج نہیں، اس کی پرورش کریں لیکن چھونے کا حق نہیں، بیٹی بولنے سے بن نہیں جاتی کیوں کہ ایسا کرنا حرام ہے، بھارت میں ہندو میرا بہت احترام کرتے ہیں کہ ذاکر بھائی سے لڑکیوں کو دور رکھیں لیکن اسلام آباد میں ٹی وی میزبان سوال پوچھنے میرے نزدیک آتی رہی، میں پیچھے ہٹ رہا ہوں اور وہ اوپر آتی جارہی ہے، آپ مسلمان ہیں یہ کیا ہورہا ہے ۔
خیال رہے کہ ڈاکٹر ذاکر نائیک کے سٹیج چھوڑنے کی ویڈیو سوشل میڈیا پر کافی وائرل ہوئی تھی جس کے بعد ان کے اس عمل پر تنقید ہوئی، یہ واقعہ اس وقت پیش آیا جب ڈاکٹر ذاکر نائیک اسلام آباد میں یتیم بچوں کی ایک غیر سرکاری تنظیم ’پاکستان سویٹ ہوم‘ کی جانب سے بچوں کو شیلڈ دینے کی تقریب میں بطور مہمان خصوصی مدعو کیے گئے، پروگرام کے اختتام پر سویٹ ہوم کے چیئرمین زمرد خان نے ڈاکٹر ذاکر نائیک کے ہاتھوں یتیم بچیوں کو شیلڈ دلوانے کیلئے مدعو کیا، تاہم سٹیج پر جب لڑکیاں آئیں تو ڈاکٹر ذاکر نائیک پیچھے ہٹ کر سٹیج سے اتر گئے۔