کراچی (نیوزڈیسک) سندھ حکومت کے سینئر وزیر شرجیل انعام میمن نے الزام عائد کیا ہے کہ پی ٹی آئی قیادت بیرونی ملک دشمن ایجنڈوں پر عمل پیرا ہے، ملک کے مستحکم اداروں کے خلاف سازشیں اور ان پر حملے اسرائیلی آشیرواد سے کئے جا رہے ہیں، عمران خان ملکی اداروں کو کمزور کرکے صیہونی مفادات کے لئے راستہ ہموار کرنا چاہتے ہیں۔
اپنے ایک بیان میں انہوں نے کہا کہ عمران اسرائیل گٹھ جوڑ ایس سی او کانفرنس کو سبوتاژ کرنے کے لئے سرگرداں ہے، عمران خان پاکستان میں سیاست نہیں بلکہ صیہونی مفادات کے تحفظ کے لئے کام کر رہے ہیں، عمران خان کے تل ابیب کے ساتھ روابط ملک دشمن قوتوں کی جانب سے ایس سی او کو سبوتاژ کرنے کی مربوط کوششوں کا حصہ ہیں، پی ٹی آئی اور اسرائیل کا گٹھ جوڑ پاکستان کے قومی مفادات پر سمجھوتہ ہے۔

شرجیل انعام میمن کا کہنا ہے کہ ماضی میں بھی عمران خان پاک چین دوستی کو نقصان پہنچانے کے لئے چینی صدر کے دورے کو سبوتاژ کرنے کی سازش کا حصہ رہے ہیں، پی ٹی آئی قیادت بیرونی ملک دشمن ایجنڈوں پر عمل پیرا ہے، پاکستان کی سلامتی و خودمختاری پر ملک دشمن مفادات کو ترجیح دیتی ہے، پی ٹی آئی کا تھنک ٹینک اس وقت تل ابیب میں بیٹھا ہوا ہے اور پاکستان کے خلاف سازشوں میں مصروف ہے۔
صوبائی وزیر نے مزید کہا کہ پی ٹی آئی کے اہم پالیسی مشیر اسرائیل میں بیٹھے ہیں، جو پاکستان کو کمزور کرنے کے لیے سرگرم ہیں، پی ٹی آئی کو تل ابیب سے پالیسیاں، ہدایات اور حمایت مل رہی ہے، بین الاقوامی لابنگ کے لئے تل ابیب میں پی ٹی آئی کے ہینڈلرز مسلسل متحرک ہیں، بیرونی قوتوں کی جانب سے پی ٹی آئی کی امداد کا مقصد ملک میں سیاسی عدم استحکام پیدا کرنا اور پاکستان کی اقتصادی اور سفارتی ترقی کو نقصان پہنچانا ہے۔
رہنماء پیپلزپارٹی کا کہنا ہے کہ پاکستانی نژاد صادق خان کے مقابلے میں زیک گولڈ اسمتھ کی توثیق عمران اسرائیل گٹھ جوڑ کا ثبوت ہے، فلسطین پر اسرائیلی جارحیت کے خلاف اے پی سی میں پی ٹی آئی کی عدم شرکت نے پی ٹی آئی اور اسرائیل گٹھ جوڑ کو بے نقاب کردیا، زیک گولڈ اسمتھ جیسے افراد پی ٹی آئی کے لیے سازگار پاکستان مخالف بیانیہ کو فروغ دے رہے ہیں۔