اسلام آباد(نیوزڈیسک) پی ٹی آئی کے سینیٹر شبلی فراز نے کہاہے کہ امریکا حسب روایت پاکستان سے زیادہ اپنے مفادات کا خیال رکھے گا، بدقسمتی سے ہم ایسی پالیسی بھی نہیں بنا سکتے کہ بتا سکیں ہم آزاد و خودمختار قوم ہیں۔امریکی انتخابات سے متعلق نجی ٹی وی سے گفتگو کرتے ہوئے شبلی فراز نے کہا کہ امریکی انتخابات دنیا کیلئے اہم ہوتے ہیں، امریکی ووٹرز اور حکومت اپنے مفادات کے تحت فیصلے کرتے ہیں۔
انہوں نے کہاکہ امریکا سپر پاور ہے اور کئی ممالک اس کو دیکھ کر خارجہ پالیسی بناتے ہیں، امریکا کی پہلی ترجیح اپنا ملک ہوتا ہے۔شبلی فراز نے کہاکہ امریکی پہلے کوشش کرتے ہیں کہ وہ اپنے ملک کو کیسے طاقت ور اور بہتر بنائیں، بد قسمتی سے پاکستان میں ایسا نہیں ہوتا اور ہم سیاسی طور پر کمزور ہو گئے ہیں۔
پی ٹی آئی کے سینیٹر نے کہاکہ ہم بدقسمتی سے ایسی پالیسی بھی نہیں بنا سکتے کہ بتا سکیں کہ ہم آزاد و خودمختار قوم ہیں۔
انہوںنے کہاکہ پاکستان کے مفادات کا خیال ہمیں خود رکھنا ہو گا، پاکستان کی حکومت کو چاہیے کہ خود کو مستحکم کرتے ہوئے واضح پالیسی بنائے۔شبلی فراز انے کہاکہ پاکستان ایسی پالیسی بنائے جس سے ملک کو فائدہ ہو، ایسا نہ ہو کہ ہم کسی اور کے مفاد کو دیکھتے رہیں۔انہوں نے کہا کہ بد قسمتی سے ہماری کمزور حالت ہے، دو طرفہ تعلقات کے طریقہ کار پر کام کرنا ہو گا۔