راولپنڈی(نیوزڈیسک) انسداد دہشتگردی کی عدالت نے بانی پی ٹی آئی عمران خان کا تھانہ نیو ٹاﺅن میں درج کئے گئے مقدمے میں 5روزہ جسمانی ریمانڈ منظور کرلیا،جسمانی ریمانڈ منظور ہوتے ہی بانی پی ٹی آئی کے سیل کو پولیس اسٹیشن ڈکلیئر کر دیا گیا،انسداد دہشتگردی عدالت کے جج امجد علی شاہ نے راولپنڈی کی اڈیالہ جیل میں سماعت کی۔
پراسیکیوشن نے 15 روزہ جسمانی ریمانڈ مانگا تھا جس پر عدالت نے عمران خان کا پانچ روزہ جسمانی ریمانڈ منظور کیا۔بانی پی ٹی آئی کی مقدمے سے ڈسچارج کرنے کی استدعا مسترد کردی گئی عمران خان جسمانی ریمانڈ پر اڈیالہ جیل میں تھانہ نیو ٹاون پولیس کی حراست میں رہیں گے۔عمرن خان کو تھانہ نیوٹاون کے مقدمے میں 26 نومبر کو دوبارہ عدالت میں پیش کیا جائے گا۔

تفتیشی آفیسر راشد کیانی اڈیالہ جیل میں تفتیش کریں گے۔واضح رہے کہ گزشتہ روزاسلام آباد ہائیکورٹ کی جانب سے توشہ خانہ 2کیس میں بانی پی ٹی آئی عمران خان کی ضمانت منظور کرنے اور انہیں رہا کرنے کا حکم دیاگیا تھا ۔اسلام آباد ہائیکورٹ بانی پی ٹی آئی کو 10، 10 لاکھ روپے کے مچلکے جمع کرانے کا حکم دیتے ہوئے ان کی ضمانت منظور کی تھی۔عدالت نے اس کے ساتھ ہی بانی پی ٹی آئی کو ٹرائل کورٹ کے سامنے بھی پیش ہونے کا حکم دیا تھا۔
تاہم بعد ازاں پاکستان تحریک انصاف کے بانیعمران خان کو راولپنڈی کے تھانہ نیوٹاون میں درج دہشت گردی کے مقدمے میں گرفتار کرلیا گیا تھا۔ بانی پی ٹی آئی کے خلاف جلاو گھیراو، املاک کو پہنچانے پر راولپنڈی پولیس نے تھانہ نیو ٹاﺅن میںمقدمہ درج کیا تھا۔تھانہ نیو ٹاون میں عمران خان کے خلاف جلاو گھیراو، پتھراو، پولیس سے مزاحمت، سرکاری املاک کو نقصان پہنچانے کا مقدمہ دہشت گردی سمیت دیگر دفعات کے تحت درج کیا گیاتھا۔
یہ بھی بتایاگیا تھا کہ ایس ایس پی انوسٹی گیشن کی سربراہی میں ٹیم راولپنڈی کی اڈیالہ جیل میں عمران خان سے تفتیش کرنے پہنچی تھی ۔ راولپنڈی پولیس کے ترجمان کا کہنا تھا کہ عمران خان کو جسمانی ریمانڈ کے حصول کیلئے عدالت میں پیش کیا جائے گا۔ عمران خان کے خلاف تھانا نیو ٹاون میں مقدمہ 28 ستمبر کو درج کیا گیا تھا۔