اسلام آباد (نیوزڈیسک) پاکستان پیپلزپارٹی کے رہنماء اور چیئرمین سینیٹ سید یوسف رضا گیلانی نے کہا ہے کہ پیپلز پارٹی وفاقی کابینہ کا پہلے بھی حصہ نہیں تھی اور آئندہ بھی کابینہ کا حصہ نہیں ہوگی۔ اسلام آباد میں میڈیا سے گفتگو کرتے ہوئے انہوں نے کہا کہ ہم سے جو تحریری معاہدہ ہوا اس پر عملدرآمد کیا جائے، پیپلزپارٹی کو جو تحفظات تھے اس متعلق مذاکرات جاری ہیں، تمام سیاسی مسائل کا حل مذاکرات ہیں، مہذب دنیا میں مذاکرات سے ہی مسائل کا حل نکالا جاتا ہے، جب کوئی حتمی بات ہوگی تو سب کو اگاہ کیا جائے گا۔
‎قبل ازیں اسلام آباد میں صحت سے متعلق آگاہی کے سیمینار میں بطور مہمان خصوصی خطاب کرتے ہوئے‎ چیئرمین سینیٹ نے کہا کہ آئینی ترمیم کے تحت صوبے اپنی آبادی کی ضروریات کے مطابق مقامی حل نکالنے میں اقدامات اٹھا سکتے ہیں، اختیارات کی منتقلی نے صحت سے متعلق ایک جامع، شراکتی فریم ورک بنانے میں مدد کی ہے،‎ وقت آگیا ہے کہ پاکستان میں ہیلتھ کیئر کو بہتر بنانے کے لیے اجتماعی کوششیں کی جائیں۔

یوسف رضا گیلانی نے مزید کہا کہ ‎عوام کو ناصرف وہ دیکھ بھال ملے جس کے وہ مستحق ہیں بلکہ ایک ایسے معاشرے کی تشکیل کی جائے جو صحت کو ترقی کی بنیاد کے طور پر اہمیت دے،‎ وزیراعظم کے طور پر اپنے دور میں ہیلتھ کیئر کے شعبے کو مضبوط بنانے کے لیے ٹھوس اقدامات کیے، ‎بنیادی صحت کے شعبے کو بہتر بنانے اور شہری و دیہی علاقوں کے درمیان رسائی کے فرق کو ختم کرنے پر توجہ دی جائے۔
انہوں نے کہا ہم نے اپنی حکومت کے دوران وسائل کو متحرک کرنے کے لیے پبلک پرائیویٹ پارٹنرشپ کو فروغ دیا،‎ ہنرمند ہیلتھ کیئر پروفیشنلز کی کمی کو پورا کرنے کے لیے انسانی وسائل کی ترقی میں سرمایہ کاری کی حوصلہ افزائی کی، پاکستان پیپلز پارٹی کے دور حکومت میں ‎سب سے زیادہ تبدیلی ‎لانے والے سنگ میلوں میں سے ایک 18ویں آئینی ترمیم تھی، ‎ہیلتھ کیئر نظام تک رسائی نہ صرف بنیادی انسانی ‎حق ہے بلکہ قومی ترقی کی بنیاد بھی ہے۔