اسلام آباد (نیوزڈیسک) وفاقی دارالحکومت اسلام آباد کی احتساب عدالت نے 190 ملین پاؤنڈز ریفرنس کے فیصلے کیلئے نئی تاریخ مقررکر دی۔ تفصیلات کے مطابق پاکستان تحریک انصاف کے بانی چیئرمین عمران خان اور ان کی اہلیہ بشریٰ بی بی کے خلاف 190 ملین پاؤنڈز ریفرنس کا فیصلہ مؤخر کردیا گیا ہے، اس حوالے س محفوظ فیصلہ اب عدالت کی جانب سے 6 جنوری کو سنایا جائے گا۔
بتایا گیا ہے کہ اسلام آباد کی احتساب عدالت میں 190 ملین پاؤنڈز ریفرنس کی سماعت ہوئی، جہاں احتساب عدالت کے جج ناصر جاوید رانا نے سماعت کی تاہم مقررہ تاریخ کے باوجود بانی پی ٹی آئی اور بشریٰ بی بی کے خلاف فیصلہ نہ سنایا جاسکا، دوران سماعت وکیل خالد چوہدری نے کہا کہ ’ہم توقع کر رہے ہیں آج فیصلہ آئے گا‘۔

اس پر جج نے ریمارکس دیتے ہوئے کہا کہ ’فیصلہ تو آج نہیں آئے گا کیوں کہ ہائیکورٹ کا کورس بھی ہے اور ابھی ہم کیس کا فیصلہ لکھ رہے ہیں، بس 10 منٹ تک آک کیس کا فیصلہ سنانے کی نئی تاریخ معلوم کرسکتے ہیں‘، بعد ازاں تحریک انصاف کے وکیل خالد یوسف کو عدالتی عملے نے نئی تاریخ سے آگاہ کیا، جس میں عدالتی عملے نے بتایا کہ 190 ملین پاؤنڈز سکینڈل کیس کا محفوظ فیصلہ 6 جنوری کو سنایا جائے گا۔

بتایا جارہا ہے کہ اسلام آباد کی احتساب عدالت نے سابق وزیر اعظم عمران خان اور ان کی اہلیہ بشریٰ بی بی کے خلاف 190 ملین پاؤنڈز ریفرنس کا فیصلہ محفوظ کیا جو پیر کو سنایا جانا تھا، 190 ملین پاؤنڈز ریفرنس میں گزشتہ سال 27 فروری کو فرد جرم عائد کی گئی تھی جس کے بعد 190 ملین پاؤنڈ ریفرنس کا ٹرائل تقریباً ایک سال مکمل ہوا اس دوران نیب نے ٹرائل کے دوران 35 گواہان کے بیانات ریکارڈ کرائے، بانی پی ٹی آئی کے وکلا نے گواہان پر جرح کی، 190 ملین پاؤنڈ ریفرنس میں اہم گواہان سابق پرنسپل سیکرٹری اعظم خان، سابق وزیراعلیٰ پرویزخٹک، سابق وفاقی وزیر زبیدہ جلال نے بھی بیان ریکارڈ کروایا۔