اسلام آباد(نیوزڈیسک)وزیراعظم شہباز شریف نے وفاقی کابینہ میں توسیع کے حوالے سے مشاورت مکمل کرلی،کابینہ میں توسیع و ردوبدل پر آئندہ ماہ عملدرآمد کیا جائیگا،وفاقی کابینہ میں توسیع کے حوالے سے وزیراعظم شہباز شریف نے مسلم لیگ ن کے قائد نواز شریف سے بھی صلاح و مشورہ مکمل کرلیا ہے، جیو نیوز کے مطابق وزیراعظم نے اتحادی جماعتوں سے بھی رابطوں کے دوران انہیں کابینہ میں توسیع کے حوالے سے اعتماد میں لیا ہے۔
کابینہ میں اہم ترین شمولیت وزیراعظم کے سابق پرنسپل سیکریٹری ڈاکٹر سید توقیر شاہ کااضافہ ہوگی جو ان دنوں عالمی بینک میں ایگزیکٹو ڈائریکٹر ہیں جبکہ بیرسٹر عقیل ملک، ڈاکٹر طارق فضل چوہدری، سینیٹرطلال چوہدری، طاہر خلیل سندھو اور حنیف عباسی کے نام ممکنہ وزرا کے طور پر لئے جارہے ہیں۔

وفاقی وزیر سینیٹر احد چیمہ کی نگرانی میں وزارتی کارکردگی کے جائزے کا نظام وزیراعظم ہاﺅس میں قائم کیا جارہا ہے جس میں وفاقی کابینہ کے ارکان کی کارکردگی اور کابینہ کی مجموعی استعداد کے باقاعدگی سے جائزے کا نظام بھی قائم کیا جائے گا جس کے بعد ایوان وزیراعظم سہ ماہی بنیادوں پر کارکردگی کے حوالے سے اپنا جائزہ مرتب کرےگا۔

یہ بھی بتایا گیا ہے کہ وفاقی کابینہ میں شامل ہونے والے سید توقیر شاہ کو وزیراعظم نے کئی ہفتے قبل انہیں وطن واپس آنے اور وفاقی کابینہ کا حصہ بننے کی دعوت دی تھی جسے انہوں نے قبول کرلیا تھا اور وہ وفاقی کابینہ میں مکمل وزیر کے درجے پر فائز ہوں گے۔ انہیں وزیراعظم کامعاون خصوصی مقرر کیا جائےگا۔ڈاکٹر سید توقیر شاہ جو ان دنوں عالمی بینک میں ایگزیکٹو ڈائریکٹر ہیں انہیں گزشتہ سال نومبر میں چار سال کیلئے اس منصب پر مقرر کیا گیاتھا اور سابق نگران وزیراعظم انوارالحق کاکڑ نے ان کااستعفیٰ منظور کرکے واشنگٹن میں بنک کی ذمہ داری قبول کرنے کی اجازت دی تھی۔
یاد رہے کہ وفاقی کابینہ میں اس وقت18 ارکان شامل ہیں جبکہ کابینہ کی مجموعی تعداد 33 ہے جن میں دو وزرائے مملکت، تین خصوصی معاونین اور ایک مشیر وفاقی حکومت کا حصہ ہیں۔