راولپنڈی(نیوزڈیسک)راولپنڈی کی اڈیالہ جیل میں توشہ خانہ 2کیس کی سماعت کے دوران بانی پی ٹی آئی عمران خان کو بطوروزیراعظم ملنے والے تحائف کی فہرست میں عدالت میں پیش کر دی گئی، گواہ نے توشہ خانہ تحائف کے ریکارڈ سے متعلق 2رجسٹر بھی عدالت پیش کردئیے، کیبنٹ ڈویژن کے سیکشن آفیسر بنیامین کا بیان ریکارڈ کرلیا گیا،توشہ خانہ 2 کیس کی سماعت سپیشل جج سینٹرل شاہ رخ ارجمند نے اڈیالہ جیل میں کی سماعت کے دوران بانی پی ٹی آئی عمران خان کو کمرہ عدالت میں پیش کیا گیا، بشریٰ بی بی بیرسٹر گوہر، سلمان اکرم راجا اور فیصل چوہدری بھی سماعت کے موقع پر عدالت میں پیش ہوئے۔
عدالت میں عمران خان کو بطور وزیراعظم ملنے والے 100 سے زائد تحائف کی فہرست پیش کی گئی۔

دوران سماعت عدالت میں گواہ نے 100 صفحات پر مشتمل ریکارڈ عدالت میں پیش کردیا۔ گواہ کی جانب سے توشہ خانہ 2 کیس کے سلسلے میں بانی پی ٹی آئی عمران خان کو بطور وزیر اعظم ملنے والے 108تحائف کی فہرست عدالت پیش کی گئی جبکہ گواہ نے توشہ خانہ تحائف کے ریکارڈ سے متعلق 2رجسٹر بھی عدالت پیش کردئیے۔

گواہ نے پرائیویٹ اپریزر کا قانونی طریقہ کار بھی عدالت میں پیش کیا۔بانی پی ٹی آئی کی اہلیہ بشریٰ بی بی کے وکیل ارشد تبریز نے گواہ پر جزوی جرح کی جو آئندہ سماعت پر مکمل کی جائے گی جبکہ آئندہ سماعت پر بانی پی ٹی آئی کے وکیل سلمان صفدر بھی گواہ پر جرح کریں گے۔بعد ازاں عدالت نے توشہ خانہ 2 کیس کی سماعت 2 جنوری تک ملتوی کردی۔قبل ازیںبانی پی ٹی آئی کی اہلیہ بشریٰ بی بی اڈیالہ جیل پہنچ گئیں تھیں۔
وفاقی پراسیکیوٹر ذوالفقار عباس نقوی اور بیرسٹر عمیر مجید ٹیم کے ہمراہ پیش ہوئے تھے۔بانی پی ٹی آئی کے وکیل فیصل مفتی اور ارشد تبریز عدالت میں موجود تھے۔توشہ خانہ کیس ٹو میں اب تک 2 گواہان کے بیانات قلمبند اور جرح بھی مکمل ہو چکی تھی اس کیس میں 23 گواہان کی فہرست عدالت میں جمع کی جا چکی ہے۔