اسلا م آباد(نیوزڈیسک)وزیراعظم شہباز شریف نے کہا ہے کہ فتنہ الخوارج کے مکمل خاتمے کا وقت قریب آچکا ہے، خارجی ہاتھوں کا ہمیں بخوبی علم ہے، دشمن گھات لگائے بیٹھا ہے،ہمیں معلوم ہے کہ بلوچستان میں پاکستان کے خلاف بنی جانے والی سازشوں میں کون کون سے ممالک سپورٹ کررہے ہیں، نیشنل ایپکس کمیٹی کے اجلاس سے خطاب کرتے ہوئے وزیراعظم کا کہنا تھا کہ پاکستان نے سلامتی کونسل کی غیر مستقل رکنیت کی ذمہ داری سنبھال لی ہے اور سلامتی کونسل میں ہماری ذمہ داریاں دوسال کیلئے ہیں۔
ان شا اللہ اس دوران پاکستان اپنا بھرپور کردار ادا کرے گا اور عالمی سفارت کاری میں اپنی پوری استعداد کے ساتھ شریک ہوگا۔ سرحد پار سے پاکستان پر چند دن پہلے حملہ ہوا اور دشمن کے حملے کا منہ توڑ جواب دیا گیا۔

دشمن گھات لگائے بیٹھا ہے۔ پاکستان میں دہشتگردوں کے گھس بیٹھیے موجود ہیں۔ پاکستان کے خلاف سازشیں بنی جارہی ہیں۔ ہمیں خارجی ہاتھوں کا اچھی طرح علم ہے۔

انہوں نے کہا کہ یہاں پر ان کے جو گھس بیٹھیے موجود ہیں خاص طور پر پختونخواہ کے بعض علاقوں میں اور بلوچستان میں جو پاکستان کے خلاف مختلف قسم کی سازشیں بنی جا رہی ہیں ان میں جو خارجی ہاتھ ہے اس کا ہمیں اچھی طرح علم ہے کہ کن ممالک سے انہیں سپورٹ مل رہی ہے۔ ہمیں پتا ہے کون کون سے ممالک دہشتگردوں کو یہاں سپورٹ کررہے ہیں۔ دفاعی اداروں سے مل کر دہشتگردوں کے خاتمے کا مربوط پلان بنانا ہوگا۔
پاکستان کی ترقی اور خوشحالی کا ایجنڈا اسی صورت شرمندہ تعبیر ہوسکتا ہے کہ ہم سب مل کر چاروں صوبوں، وفاق، گلگت بلتستان اور آزاد کشمیر میں امن و امان قائم کریں۔ اس کے ساتھ فتنہ الخوارج کا مکمل خاتمہ کرنے کا وقت آچکا ہے۔ اگر صوبے وفاق اور دفاعی اداروں کے ساتھ مل کر پاکستان کی بہتری اور خوشحالی کے لیے مربوط منصوبہ بندی کریں تو بطور وزیراعظم میری کوئی پسند و ناپسند نہیں ہے، قومی مفاد پہلی ترجیح ہے اور مجھے سو فیصد یقین ہے کہ دیگر شرکا کی بھی یہی سوچ ہے۔
اگر ہم اس سوچ کو عملی جامہ پہنائیں تو پھر کوئی مشکل، مشکل نہیں رہے گی۔پچھلے دو چار ہفتوں میں اسلام آباد پر جو یلغار ہوئی اس کے نتیجے میں سوشل میڈیا نے جھوٹ اور حقائق کو مسخ کرنے کا جو طوفان اٹھایا حالیہ وقتوں میں اس کی نظیر نہیں ملتی اگر اس طوفان کو نہ روکا تو ہماری تمام کاوشیں دریا برد ہوجائیں گی۔وزیراعظم شہباز شریف کا اپنے خطاب میں مزید کہنا تھا کہ اسی طرح ڈیجیٹل محاذ پر جو پاکستان کے خلاف زہر اگلا جا رہا ہے۔
پاکستان سے باہر جو ایجنٹ بیٹھے ہیں۔ پاکستان کے دشمن بیٹھے ہیں جس طرح سے وہ پاکستان کے خلاف سوشل میڈیا پر مہم چلا رہے ہیں یہ بہت بڑا چیلنج بن چکا ہے۔ وہ جھوٹ کے ذریعے حقائق کو مسخ کرکے سوشل میڈیا پر پیش کررہے ہیں جس سے ایسا ماحول بنایا جا رہا ہے کہ پاکستان کے خلاف جھوٹ کی بنیاد پر سوالیہ نشان اٹھائے جا رہے ہیں۔ان کا کہنا تھا کہ اسلام آباد پر چڑھائی ہوئی رینجرز جوان شہید ہوئے جھوٹی خبریں بنائی گئیں۔
سوشل میڈیا پر جھوٹ کا طوفان اٹھایا گیا، حالیہ وقتوں میں سوشل میڈیا پر جھوٹ کی ایسی مثالیں نہیں ملتیں اگر روکا نہ گیا تو تمام کاوشیں دریا برد ہوجائیں گی۔وفاقی اور صوبائی سطح پر سوشل میڈیا پر جھوٹی مہم کا مقابلہ کرنے کی کوشش کررہے ہیں۔وزیراعظم نے مزید کہا کہ آج ہم نے ان تمام معاملات پر سنجیدگی کے ساتھ گفتگو کرنی ہے۔فوج اور پولیس کے جوان پاکستان کیلئے خون کا نذرانہ پیش کررہے ہیں یہ قربانیاں رائیگاں نہیں جائیں گی۔
جو لوگ شہداءکی قربانیوں کو رائیگاں کرنا چاہتے ہیں وہ بہت بڑی بھول میں ہیں۔پاکستان قائم ودائم رہے گا، مل کر چلیں گے تو اس فتنے کا خاتمہ کریں گے اور ملک ترقی کی راہ پر گامزن ہوگا۔انہوں نے کہا کہ یہ ایجنٹ جھوٹ کے ذریعے حقائق کو مسخ کررہے ہیں اس جھوٹ اور حقائق مسخ کرنے کی بنیاد پر پاکستان خلاف بیانیہ بنایا جارہا ہے۔ سوالات اٹھوائے جارہے ہیں۔انہوں نے کہا کہ ان شا اللہ پاکستان قائم و دائم رہے گا اور ان قربانیوں کے نتیجے میں ہم اتحاد اور عمل کے راستے پر چلتے ہوئے فتنوں کا خاتمہ اور پاکستان کو ترقی کی راہ پر گامزن کر سکیں گے۔