اسلام آباد(نیوزڈیسک) وزارت داخلہ نے تحریک لبیک پاکستان کو کالعدم جماعت قرار دیتے ہوئے فرسٹ شیڈول کی فہرست میں شامل کردیا۔ وزرات داخلہ نے ٹی ایل پی کو کالعدم جماعت قرار دے دیا، جس کے بعد ٹی ایل پی کو فرسٹ شیڈول کی فہرست میں شامل کردیا گیا ہے۔حکومت کی جانب سے ٹی ایل پی پر پابندی کے حوالے سے نوٹی فکیشن بھی جاری کردیا گیاہے، جس کے تحت کالعدم تنظیم پر سرگرمیاں کرنے پر پابندی ہوگی۔
وزارت داخلہ کے مطابق ٹی ایل پی کو انسداد دہشت گردی ایکٹ کے تحت کالعدم قرار دیا گیا ہے، جس کے بعد اب وزارت داخلہ کی رپورٹ وزرات قانون کو بھجوائی جائے گی۔ وزرات قانون ریفرنس تیار کر کے سپریم کورٹ میں جمع کرائے گی۔ گزشتہ روز وفاقی حکومت نے ٹی ایل پی پر پابندی عائد کرنے کی منظوری دے دی۔

کابینہ کی منظوری کے بعد وزارت داخلہ کو مزید کارروائی کیلیے احکامات جاری، پنجاب حکومت نے پابندی کی سفارش کی تھی۔

وزیراعظم کی زیر صدارت وفاقی کابینہ کا اجلاس ہوا۔ کابینہ کے اجلاس میں پنجاب حکومت کی ٹی ایل پر پابندی کی سفارش پر اراکین کو آگاہ کیا گیا۔ وفاقی کابینہ نے آئین کے آرٹیکل 17 کے تحت ٹی ایل پر پابندی کی مںظوری دی جبکہ وزارت داخلہ کو مزید کارروائی کیلیے احکامات جاری کردیے گئے۔