لاہور(سٹاف رپورٹر) مسلم لیگ (ن) پنجاب کی سیکرٹری اطلاعات عظمی بخاری نے کہا ہے کہ حکومتی کشتی طوفانی لہروں میں ہچکولے کھارہی ہے اور فردوس عاشق کو پی ڈی ایم اور راجکماری کی فکر پڑی ہے،بی بی کچھ عام آدمی کا بھی سوچ لو،خادمہ جی نہ پی ڈی ایم کہی جارہی ہے اور نہ راجکماری لیکن عوام آپ کی نالائقیوں کی بھینٹ چڑھ رہی ہے ۔
اپنے بیان میں انہوں نے کہا کہ مریم نواز قوم کو نالائقوں کے ٹولے سے نجات دلاکر ہی کہیں جائیں گی ،کٹھ پتلی حکومت سے پہلے مریم نواز برداشت نہیں ہورہی تھیںاب حمزہ شہباز کے بعد شہبازشریف بھی باہر آگئے ہیں،سلطنت عمرانیہ کے احتساب کی ہنڈیا بیچ چوراہے پٹ گئی ہے ،عمران خان نے خود تسلیم کیا چینی مافیا نے ان کو بیوقوف بنایا ،کل تک عمران خان چینی کی قیمت کنٹرول کرنے کے لئے جہانگیرترین سے مشورے لیتے رہے ،آج جہانگیرترین کو چینی مافیا کا سرغنہ کہہ رہے ہیں عمران صاحب مافیا کے اصل سرغنہ آپ ہیں۔