اسلام آباد ( نیوزڈیسک) عالمی وباء کورونا وائرس کی شدت کے باعث وفاقی حکومت نے عوام سے رمضان اور عید سادگی سے منانے کی اپیل کردی ۔ تفصیلات کے مطابق معاون خصوصی ڈاکٹر فیصل سلطان نے کہا ہے کہ رمضان اور عید سادگی سے گزارنی ہوگی ، کورونا سے نمٹنے کے لیے پاک فوج تعاون فراہم کررہی ہے ، ایس او پیز پر عمل نہ کیا گیا تو مردان کے بعد دیگر شہروں میں بھی لاک ڈاوَن لگایا جا سکتا ہے ۔
اسلام آباد میں میڈیا بریفنگ میں انہوں نے کہا کہ کورونا سے نمٹنے کے لیے اقدامات کررہے ہیں ، ملک میں ویکسی نیشن کا عمل بلا تعطل جاری ہے ، کورونا کی صورتحال سے شہر کے ہیلتھ سسٹم کا اندازہ لگاتے ہیں ، ہر روز ہیلتھ کیئر سسٹم کی صلاحیت بڑھا رہے ہیں ، پاکستان اسٹیل ملز کے آکسیجن پلانٹ کو بھی دیکھ رہے ہیں ، مختلف ممالک سے آکسیجن کی امپورٹ کو ممکن بنایا جاسکتا ہے ، آکسیجن کے پلانٹ سے منتقلی پر بھی نظر رکھے ہوئے ہیں ۔
معاون خصوصی نے کہا کہ کورونا کیسز بڑھنے پر مردان میں لاک ڈاؤن لگادیا گیاہے ، کوروناکیسز میں کمی نہیں آئی تو باقی شہروں میں بھی لاک ڈاؤن لگایا جاسکتا ہے ، ویکسی نیشن سےمتعلق اطلاعات چلتی رہی ہیں ، دنیا بھر میں ویکسین کی کمی ہے ، حکومت تحفے اور ڈونیشن میں ملنے والی ویکسین پر انحصار نہیں کررہی ، تین کمپنیوں سے ویکسین خرید رہے ہیں ، ویکسین کی ڈیمانڈ زیادہ ہے اور سپلائی کم ہے ، کئی ممالک کو ایڈوانس بکنگ کے باوجود ویکسین فراہم نہیں ہوسکی ، کوویکس کی طرف سے آنے والی ویکسین نہیں ملی ۔
ڈاکٹر فیصل سلطان نے کہا کہ ملک بھر میں 1200 ویکسی نیشن سینٹر ہیں ، جہاں 20 لاکھ سے زیادہ ویکسین کی ڈوز لگ چکی ہیں ، 50 سال سے زائد عمر کے لوگوں کی ویکسین چل رہی ہے ، ویکسی نیشن سینٹر جمعہ کو بند اور اتوار کو کھلتے ہیں ، آج سے 40 سال عمر کے زائد لوگوں کیلئے رجسٹریشن شروع کردی ہے ، 30 مارچ سے 30 لاکھ ویکسین ڈوز خرید چکے ہیں ، 17 لاکھ ڈوزز حکومت چین کی طرف سے تحفے میں آئی ہے ، جب کہ 3 کروڑ ویکسین ڈوز خریدنے کا معاہدہ کرلیا ہے ، ان مین سے ایک معاہدہ کین سائنوکمپنی سے ٹرانسفارم ٹیکنالوجی پاکستان لانے کا ہے ، کین سائنو کمپنی کی ویکسین کی فلنگ پاکستان میں ہوگی۔