اسلام آباد ( نیوز ڈیسک) پاکستان نے فلسطینیوں کیلئے امدادی سامان بھیجنے کا فیصلہ کرلیا جس کی وفاقی کابینہ نے منظوری دے دی۔ تفصیلات کے مطابق وفاقی کابینہ کا اجلاس وزیر اعظم عمران خان کی زیر صدارت ہوا، جس میں کابینہ نے فلسطین کے لیے امدادی سامان بھجوانے کی منظوری دی، حکومت پاکستان فلسطین کے لیے طبی سامان بھجوائے گی۔
اس کے علاوہ وفاقی کابینہ نے ای سی سی اجلاس کے فیصلوں کی بھی توثیق کردی ، ای سی سی نے آئی پی پیز کو 40 فیصد واجبات ادا کرنے کی منظوری دی تھی جس کی اب وفاقی کابینہ کی جانب سے بھی توثیق کردی گئی ہے۔ بتایا گیا ہے کہ وفاقی کابینہ نے اقوام متحدہ کی 4 گاڑیوں کو پاکستان کے راستے کابل جانے کی منظوری دی، پاک چین سفارتی تعلقات کے 70 سال مکمل ہونے پریادگاری سکہ جاری کرنے کی بھی منظوری دی گئی ، اس کے ساتھ ساتھ وفاقی کابینہ نے ریلوے پولیس کے دائرہ اختیارسے متعلقہ ایس آراوز جاری کرنے کی منظوری سمیت الیکشن کمیشن کی سالانہ رپورٹ پارلیمنٹ میں پیش کرنے کی منظوری دے دی جب کہ وفاقی کابینہ نے کرتارپور راہداری منصوبے کو پیپرا رولز سے استثنی دینے کی اصولی منظوری دے دی، اس کے تکنیکی معاملات دیکھنے کے لیے معاملہ پیپرا کو بھجوا دیا گیا ، کابینہ اجلاس میں نجی ایئرلائن کو پیسنجر اینڈ کارگو لائسنس جاری کرنے کی بھی منظوری دی گئی ، کابینہ کمیٹی برائے ادارہ جاتی اصلاحات کے فیصلوں سمیت کابینہ کمیٹی برائے قانون سازی کے فیصلوں کی بھی توثیق کردی گئی۔
ذرائع کے مطابق کابینہ کے اجلاس میں پاکستان ہاؤسنگ اتھارٹی فاونڈیشن کے چیف ایگزیکٹوکی تعیناتی کی منظوری موخر کردی گئی ، جب کہ الیکٹرانک سرٹیفیکیشن ایکریڈیشن کونسل کے ارکان تعینات کرنے اور بیرون ملک پاکستانی مشنزمیں کمیونٹی ویلفیئر اتاشی تعینات کرنے کی منظوری بھی موخرکردی گئی۔