اسلام آباد (نیوزڈیسک) ملک بھر میں موڈرنا اور سائنو فارم ویکسین کی پہلی ڈوز لگانے کا عمل روک دیا گیا۔ تفصیلات کے مطابق نیشنل کمانڈ اینڈ آپریشن سینٹر کی جانب سے ملک بھر میں جاری کرونا ویکسی نیشن مہم کے حوالے سے اہم اعلامیہ جاری کیا گیا ہے۔ اعلامیہ این سی او سی کے مطابق ملک بھر کے تمام کرونا ویکسی نیشن سینٹرز پر شہریوں کو موڈرنا اور سائنو فارم کرونا ویکسین کی پہلی ڈوز لگانے کا عمل روک دیا گیا ہے۔
بتایا گیا ہے کہ اب تک ملک بھر میں بڑی تعداد میں شہریوں کو موڈرنا اور سائنوفارم ویکسین کی پہلی ڈوز دی جا چکی، اسی لیے بقیہ اسٹاک صرف دوسری ڈوز والے شہریوں کیلئے استعمال کرنے کا فیصلہ کیا گیا ہے۔ وہ تمام شہری جو موڈرنا یا سائنو فارم ویکسین کی پہلی ڈوز لگوا چکے، صرف انہیں مذکورہ ویکسینز کی دوسری ڈوز لگائی جائے گی۔

دوسری جانب نیشنل کمانڈ اینڈ آپریشن سینٹر نے ملک بھر میں شہریوں کو لگائی جانے والی کرونا ویکسین کے حوالے سے اعداد و شمار بھی جاری کر دیے۔

این سی او سی کی جانب سے جاری کئے گئے اعداد و شمار میں بتایا گیا کہ گزشتہ 24 گھنٹوں کے دوران ملک بھر میں 12 لاکھ 35 ہزار 645 افراد کو کرونا ویکسین لگائی گئی ہیں۔ این سی او سی کے مطابق اب تک ملک بھر کے شہریوں کو 6 کروڑ 45 لاکھ 54 ہزار 859 ویکسین کی خوراکیں لگائی جا چکی ہیں۔ نیشنل کمانڈ اینڈ آپریشن سینٹر نے ملک میں کرونا وائرس کیسز کی صورتحال کے حوالے سے بھی اعداد شمار جاری کیے ہیں۔ این سی او سی کے اعداد و شمار کے مطابق پاکستان میں گزشتہ 24 گھنٹوں کے دوران کرونا وائرس کے مزید 3 ہزار 902 کیسز سامنے آئے ہیں، جبکہ مزید 83 افراد اس موذی وباء کے سامنے زندگی کی بازی ہار گئے، اس کے مزید 4 ہزار 387 مریض شفایاب ہو گئے، مثبت کیسز کی شرح 6 اعشاریہ 44 فیصد ہو گئی ہے۔