اسلام آباد(نیوز ڈیسک) اسلام آباد پولیس 15 سال بعد افغان ڈکیت گروہ کو پکڑنے میں کامیاب ہوگئی ہے ۔مذکورہ ملزمان سے 55 تولے سونا اور 12 لاکھ نقد رقم بھی برآمد کی گئی ہے،مزید تفتیش کے لیے ریمانڈ پر ہیں۔سماء نیوز کے مطابق گروہ آدھی رات کے بعد گھروں میں گھس کر گن پوائنٹ پر فیملیز کو یرغمال بنا کر ڈکیتیاں کرتے تھے۔
آٹھ رکنی گینگ کے کارندے واردات کے بعد افغانستان فرار ہو جاتے تھے۔ غنی گینگ سابق وفاقی سیکرٹری کے گھر ڈکیتی سمیت لوٹ مار کی 14 وارداتوں میں اسلام آباد کے چھے تھانوں کو مطلوب تھا۔پولیس کے مطابق یہ گروہ اسلام آباد میں لوٹ مار کرکے صبح تک افغانستان پہنچ جاتا تھا۔گرفتاری پر نقدی اور طلائی زیورات سمیت لوٹ کا بھاری مال برآمد کرلیا گیا ہے۔

ڈی آئی جی آپریشنز افضال احمد کوثر کے مطابق ملزمان سے 55 تولے سونا اور 12 لاکھ نقد رقم برآمد کی گئی۔ انہوں نے کہا ان کا طریقہ واردات یہ تھا کہ رات کے وقت اُن گھروں میں گھس سکتے تھے جن کی دیواریں چھوٹی ہوتی تھیں۔ملزمان کی سہولت کاری کرنے والے عامر خان اور عزیزاللہ کو ماتحت عدالت نے جوڈیشل ریمانڈ پر جیل بھیج دیا ہے۔جبکہ دیگر چھ ملزمان عبداللہ وہاب، خدائے رام ، جنت گل، حضرت خان اور محمد کریم سے مزید تفتیش تلاش جاری ہے جو کہ اس وقت ریمانڈ پر ہیں۔
دوسری جانب لاہور انویسٹی گیشن پولیس نے گن پوائنٹ پر ڈکیتی کی وارداتوں میں ملوث لیاقوگینگ کی2اشتہاری ملزمان کو گرفتار کرلیا ۔ گرفتار ملزمان میں گینگ کا سر غنہ لیاقت عرف لیاقو اور شہبازشامل ہیں۔ ملزمان سے لاکھوں روپے نقدی،موٹرسائیکل، 3موبائل فونز اور ناجائز اسلحہ برآمد کرلیاگیا ۔ملزمان ڈکیتی اور راہزنی کے متعدد مقدمات میں لاہور پولیس کو مطلوب تھے۔