اسلام آباد (نیوز ڈیسک) : نیشنل کمانڈ اینڈ کنٹرول سینٹر (این سی اوسی) کی کاوشیں رنگ لے آئیں اور پاکستان نے کرونا ویکسی نیشن سے متعلق بڑا ہدف حاصل کرلیا ہے۔ تفصیلات کے مطابق مائیکروبلاگنگ ویب سائٹ ٹویٹر پر اپنے پیغام میں این سی او سی سربراہ اسد عمر نے بتایا کہ ان تمام لوگوں کی بے پناہ محنت سے ایک ہدف جس کو لوگ ناممکن سمجھ رہے تھے، حاصل ہو گیا ہے۔
انہوں نے کہا کہ الحمد اللہ 2021ء کے اختتام تک 7 کروڑ لوگوں کی مکمل ویکسینیشن کا ہدف پورا کرلیا گیا ہے، اس اہم سنگ میل کے عبور پر میں این سی او سی کی انتھک محنت کرنے والی ٹیم، وفاق اور صوبوں کی انتظامیہ اور صحت کی ٹیموں کا خصوصی طور پر شکر گزار ہوں۔ اسد عمر نے کہا کہ وفاقی حکومت کی طرف سے 100 فیصد ویکسین خریدی جا چکی ہے۔

تمام شہریوں کو فری ویکسین لگائی گئی۔

اسد عمر نے این سی اوسی کی ٹیم، وفاق، صوبوں کی انتظامیہ اورصحت ٹیموں کا شکریہ ادا کرتے ہوئے کہا کہ ان تمام لوگوں کی ان تھک محنت سے ایسا ہدف حاصل ہوا جسے لوگ ناممکن سمجھ رہے تھے۔ اس میں اسلام آباد سرفہرست ہے، جہاں 77 فیصد افراد مکمل ویکسین شدہ ہیں، پنجاب 51 فیصد ، گلگت بلتستان 46 فیصد ، آزاد جموں کشمیر 45 فیصد ، بلوچستان 42 فیصد ، کے پی 41 فیصد اور سندھ 37 فیصد پر ہے۔
انہوں نے ٹویٹر پیغام میں مزید تفصیلات بھی شئیر کیں اور کہا کہ کل اہل آبادی میں سے 46 فیصد کو مکمل طور پر ٹیکہ لگایا گیا ہے اور 63 فیصد نے کم از کم ایک خوراک حاصل کی ہے۔ اسد عمر کا کہنا تھا کہ اس بڑے پیمانے پر ویکسینیشن مہم کو ممکن بنانے کے لیے، وفاقی حکومت نے تقریباً 2000000 روپے مالیت کی ویکسین خریدی، 250 ارب کی 100 فیصد ویکسین کی خریداری وفاقی حکومت نے کی ہے، جس نے تمام شہریوں کو مفت ویکسین فراہم کی ہے، قطع نظر اس کے کہ وہ کس صوبے میں رہتے ہیں۔