اسلام آباد (نیوز ڈیسک) نائب صدر پیپلز پارٹی سینیٹر شیری رحمان نے کہاہے کہ وزیراعظم دھمکیوں کے ذریعے کس کو پیغام دینا چاہ رہے ہیں ان کا لہجا اور الفاظ آج بھی کنٹینر سیاست والے ہیں، حکومت کنٹینر سے آخر کب اترے گی ۔ اپنے بیان میں شیری رحمن نے کہاکہ 3 سال کی حکمرانی کے بعد لوگ آپ سے کارکردگی کے بارے میں پوچھے گی۔
انہوںنے کہاکہ آپ کی سیاست کا محور اپوزیشن جماعتیں ہیں، کارکردگی یا عوام نہیں، جمہوری اور سیاسی لوگ وزیراعظم کی کرسی پر بیٹھ کر اس طرح کی دھمکیاں نہیں دیتے۔

انہوںنے کہاکہ آپ کو شاید ابھی تک احساس نہیں ہوا کہ آپ ملک کے وزیراعظم اور پارلیمان کے قائد ایوان ہیں۔ انہوںنے کہاکہ آپ کوئی ڈکٹیٹر نہیں، اپوزیشن کو جیلوں میں رکھ کر بھی آپ ان کے خلاف کوئی جرم ثابت نہیں کر سکے۔

انہوںنے کہاکہ آپ کے تمام دعوے اور وعدے جھوٹ پر مبنی تھے، آپ کی حکومت ملکی تاریخ کی بدترین حکومت ثابت ہو چکی ہے۔ انہوںنے کہاکہ آپ عوام کو کہہ رہے ہیں کہ حالات اتنے خراب نہیں، اب لوگوں کو مزید جھوٹ نہیں برداشت ہوں گے۔ انہوںنے کہاکہ عوام آپ کو مسترد کر رہی ہے، آپ اپنی نااہلی، ناکامیوں اور بدانتظامی کی وجہ سے گھر جائے گی ۔