اسلام آباد (نیوز ڈیسک) وزیراعظم نے اسکردو اور گلگت میں آئس ہاکی کھیلتے ہوئے لڑکیوں کی تصاویر بھی شیئر کردیں، انہوں نے کہا کہ رات کی آغوش میں جگمگاتا ہوا اسکردو، ہماری لڑکیاں آئس ہاکی کھیل رہی ہیں، اسکردو میں بین الاقوامی ایئرپورٹ بننے کے بعد یہ علاقہ سرما کی کھیلوں کا ایک عالمی مرکز بنے گا۔ تفصیلات کے مطابق وزیراعظم عمران خان نے ٹویٹر پر اپنے ٹویٹ میں اسکردو اور گلگت میں آئس ہاکی کھیلتے ہوئے لڑکیوں کی تصاویر بھی شیئر کی ہیں، وزیراعظم نے کہا کہ رات کی آغوش میں سکردو جگمگاتا ہے اور ہماری بچیاں گلگت بلتستان میں برف پر ہاکی کھیل رہی ہیں۔
اسکردو میں بین الاقوامی ہوائی اڈے کی تعمیر کے ساتھ یہ علاقہ اب سرما کی کھیلوں کا ایک عالمی مرکز بنے گا، انشاءاللہ۔



اس سے قبل وزیراعظم عمران خان نے چینی میڈیا کو انٹرویو دیتے ہوئے کہا کہ میری خواہش ہے چینی کھلاڑیوں کو کرکٹ سکھائیں، کورونا سے کھیل کی سرگرمیاں متاثر ہوئیں، خیبرپختونخوا میں گلگت سمیت دیگرعلاقے کھیل کے لیے بہترین ہیں، خنجراب پاس کے قریب پاکستان اور چین میں کھیلوں کی سرگرمیوں کے خواہاں ہیں۔
یاد رہے وزیراعظم عمران خان سیاحت کے فروغ کیلئے شمالی علاقہ جات میں خوبصورت مقامات کی تصاویر شیئر اور علاقوں میں سیاحت کی اہمیت کو اجاگر کرتے رہتے ہیں۔ مزید برآں وزیراعظم عمران خان نے مصروف سیاحتی مقامات سے سیاحوں کا رش ختم کرنے کیلئے ہدایت کی کہ سیاحوں دلچسپی کے مطابق نئے سیاحتی مقامات بنائے جائیں،انہوں نے معاون خصوصی سیاحت اعظم جلیل کو ہدایت کی کہ سیاحوں کیلئے نئے سیاحتی مقامات ڈویلپ کیے جائیں۔
تاکہ مصروف سیاحتی مقامات سے سیاحوں کو دیگر مقامات کی جانب راغب کیا جاسکے، سردیوں کے موسم میں سیاحت کے شوقین لوگ مصروف سیاحتی مقامات کی بجائے دیگر مقامات کا بھی دورہ کریں گے،نئے سیاحتی مقامات کی خوبصورتی سے فائدہ اٹھانے کیلئے سہولیات اور انفرااسٹرکچر بہتر بنایا جائے، نئے سیاحتی مقامات کی تعمیر کیلئے پرائیویٹ سیکٹر سے مدد لی جائے۔ گورنرہاؤس نتھیا گلی کو بطورسیاحتی مرکز فعال بنانے کا بھی حکم دیتے ہوئے کہا کہ ریاستی مہمانوں کیلئے ایسے مقامات کو بہتر بنایا جائے۔