اسلام آباد(نیوز ڈیسک) :اسلام آباد ہائیکورٹ نے علی امین گنڈا پور اور شاہ محمود کی درخواستوں پر محفوظ فیصلہ سنا دیا۔ اسلام آباد ہائیکورٹ کے چیف جسٹس اطہر من اللہ نے درخواستوں پر فیصلہ سنایا۔ اسلام آباد ہائیکورٹ نے عمر امین گنڈا پور کی درخواست منطور کر لی۔صوبائی وزیر شاہ محمود کی نااہلی سے متعلق بھی فیصلہ سنا دیا گیا۔
شاہ محمد کی نااہلی کے خلاف الیکشن کمیشن کی جانب سے جاری نوٹیفیکیشن کالعدم قرار دیا گیا۔عمر امین گنڈا پور کو بھی الیکشن لڑنے کی اجازت مل گئی۔اسلام آباد ہائیکورٹ نے عمر امین گنڈا پور کو میئر کا الیکشن لڑنے کے اہل قرار دے دیا۔خیال رہے کہ الیکشن کمیشن نے وفاقی وزیر علی امین گنڈا پور کے بھائی عمر امین گنڈا پور کو ڈیرہ اسمعٰیل خان کے سٹی میئر کے الیکشن کے لیے نااہل قرار دیا تھا جسے انہوں نے اسلام آباد ہائیکورٹ میں چیلنج کیا ۔

عمر امین نے الیکشن کمیشن کافیصلہ کالعدم قرار دینے کے ساتھ فیصلے کی معطلی کی متفرق درخواست بھی دائر کی تھی جس میں درخواست کو فوری سماعت کے لیے مقرر کرنے کی استدعا کی گئی تھی۔ درخواست میں الیکشن کمیشن، چیف الیکشن کمشنر، ریجنل الیکشن کمشنر اور سینیٹر کامران مرتضیٰ کو بھی فریق بناتے ہوئے کہا گیا تھا الیکشن کمیشن شفافیت کے تقاضے پورے کرنے میں ناکام رہا، قانون کے مطابق شک کا فائدہ امیدوار کو ملنا چاہیے تھا، سمری انکوائری کے بغیر ضابطہ اخلاق کی خلاف ورزی کا مرتکب قرار نہیں دیا جاسکتا ہے۔
ہائیکورٹ میں کیس کی سماعت کے دوران عمر امین گنڈا پور کے وکیل نے اپنے دلائل میں کہا کہ نوٹس نہیں دیا گیا اور ساری کارروائی علی امین کے خلاف ہوتی رہی پھر آرڈر عمر امین کے خلاف جاری کردیا۔ عمر امین کے وکیل نے کہا کہ سمری انکوائری کے بعد 50 ہزار تک جرمانہ کیا سکتا ہے اور دوسری مرتبہ خلاف ورزی ہوتو ایکشن ہوسکتا ہے۔عدالت نے وکلا کے دلائل کے بعد الیکشن کمیشن کا عمر امین کو نااہل کرنے کا حکم معطل کیا۔اسلام آباد ہائیکورٹ نے کہا کہ علی امین گنڈا پور کی حد تک الیکشن کمیشن کا آرڈر آن فیلڈ رہے گا۔