لاہور (نیوز ڈیسک) : کارکردگی کے حوالے سے سامنے آنے والی حالیہ سروے رپورٹ میں سابق وزیراعظم نواز شریف اپنی کارکردگی سے پنجاب ، سندھ اور خیبرپختونخوا میں سب سے زیادہ شہریوں کو مطمئن کرنے میں کامیاب ہوئے ہیں۔ اس حوالے سے قومی اخبار روزنامہ جنگ میں شائع ہونے والی رپورٹ کے مطابق پنجاب میں 58 فیصد ، خیبرپختونخوا میں 46 فیصد جبکہ سندھ میں 51 فیصد نے نواز شریف سے مطمئن ہونے کا کہا۔
لیکن وزیر اعظم عمران خان کی کارکردگی سے خیبر پختونخوا ، سندھ اور پنجاب میں مطمئن افراد کی شرح میں کمی دیکھی جارہی ہے۔ خیبرپختونخوا میں فروری 2020ء میں 67 فیصد کارکردگی سے مطمئن تھے لیکن اب 44 فیصد نے مطمئن ہونے کا کہا۔ پنجاب میں 51 فیصد سے کم ہوکر 33 فیصد جبکہ سندھ میں ان کی کارکردگی پر 33 فیصد نے اطمینان کا اظہا ر کیا ۔

ن لیگ کے رہنما شہباز شریف پنجاب میں 58 فیصد کے ساتھ نواز شریف کے برابر ہیں ۔

سندھ میں 41 فیصد کے ساتھ دوسرے اور خیبرپختونخوا میں 43 فیصدکے ساتھ عوام کو مطمئن کرنے والے رہنماؤں میں تیسرے نمبر پر موجود ہیں ۔جبکہ بلاول بھٹو زرداری پنجاب میں مطمئن افراد کی شرح میں اضافہ کرنے میں کامیاب ہوئے لیکن سندھ اور خیبرپختونخوا میں پوزیشن برقرار نہ رکھ سکے ۔ اس بات کا انکشاف گیلپ پاکستان کے حالیہ سروے میں ہوا۔ جس میں 5 ہزار سے زائد افراد نے ملک بھر سے حصہ لیا ۔
یہ سروے 22 دسمبر 2021ء سے 31 جنوری 2022ء کے درمیان کیا گیا تھا۔ صوبوں میں رہنماؤں کی کارکردگی کے حوالے سے حاصل جوابات سے دلچسپ صورتحال دیکھنے میں آئی۔ سروے رپورٹ کے مطابق خیبر پختونخوا میں 46 فیصد کے ساتھ ن لیگ کے رہنما نواز شریف سب سے زیادہ افراد کو مطمئن کرنے میں کامیاب ہوئے ہیں ۔ جس کے بعد 44 فیصد کے ساتھ وزیر اعظم عمران خان دوسرے نمبر پر ہیں ۔
شہباز شریف 43 فیصد جبکہ بلاول بھٹو اور آصف علی زردارای سے خیبرپختونخوا میں 24 فیصد افراد نے مطمئن ہونے کا کہا ۔ گیلپ پاکستان کے مطابق خیبر پختونخوا میں فروری 2020ء میں وزیر اعظم عمران خان سے مطمئن افراد کی شرح 67فیصد تھی جو اب کم ہوکر 44فیصد ہوگئی ۔ لیکن اسی عرصے میں نواز شریف کی مقبولیت 33 فیصد سے 46 فیصداور شہباز شریف کی مقبولیت 31 فیصد سے 43 فیصد ہوگئی ہے۔
البتہ بلاول بھٹو زرداری سے مطمئن افراد کی شرح 26 فیصد سے کم ہوکر 24 فیصد دیکھی گئی ۔ پنجاب میں مسلم لیگ ن کے سربراہ نواز شریف اور شہباز شریف دونوں کی کارکردگی سے 58 فیصد افراد مطمئن نظر آئے۔ وزیر اعظم عمران خان سے 33 فیصد ، بلاول بھٹو زرداری سے 24 فیصد جبکہ آصف علی زرداری سے 21 فیصد افراد نے مطمئن ہونے کا کہا۔ گیلپ پاکستان کے مطابق دسمبر2018ء کے بعد سے پنجاب میں نواز شریف کی مقبولیت میں اضافہ دیکھا گیا اور موجودہ سروے میں وہ شہباز شریف کے برابر ہیں ۔
البتہ وزیر اعظم عمران خان سے مطمئن افراد کی شرح جو دسمبر 2018ء میں 51 فیصد تھی اب کم ہوکر 33 فیصد پر آگئی ہے۔ البتہ بلاول بھٹو زرداری دسمبر 2018ء کے مقابلے میں 18 فیصد سے اسے 24 فیصد تک لانےمیں کامیاب ہوئے ہیں۔ سندھ میں بھی مسلم لیگ ن کے سربراہ کی کارکردگی سے مطمئن افراد کی شرح سب سے زیادہ یعنی 51 فیصد دیکھی گئی ۔ شہباز شریف سے 41 فیصد جبکہ بلاول بھٹو زرداری سے 37 فیصد نے مطمئن ہونے کاکہا ۔
وزیر اعظم عمران خان سے مطمئن افراد کی شرح 33 فیصد جبکہ آصف علی زرداری سے مطمئن افراد کی شرح 31 فیصد دکھائی دی۔ سندھ کے نتائج کا موازنہ 2018ء سے کیا جائے تو نواز شریف اور شہباز شریف دونوں سے مطمئن افراد کی شرح 12 فیصد سے بڑھ کر 51 فیصد اور 41 فیصد ہوگئی ہے ۔ وزیر اعظم عمران خان سے مطمئن افراد کی شرح دسمبر 2018میں 33فیصد تھی جو فروری 2020میں 10فیصد ہوگئی لیکن اب ایک بار پھر سندھ میں 33پر دیکھی گئی ۔ لیکن بلاول بھٹو زرداری سے مطمئن افراد کی شرح 54فیصد سے کم ہوکر 39فیصد اور اب 37فیصد پر دکھائی دی ۔