اسلام آباد ( نیوز ڈیسک ) وزیراعظم عمران خان کا ساتھ چھوڑنے پر پی ٹی آئی ایم این ایز کی ق لیگ سے ٹکٹ کی ڈیل کا دعویٰ سامنے آگیا ، سینئر صحافی و تجزیہ کار حامد میر کہتے ہیں کہ آنے والے دنوں میں ایسے پی ٹی آئی ایم این ایز کے نام بتاؤں گا جنہوں نے پرویز الٰہی سے ڈیل کی ہے کہ عمران خان کا ساتھ چھوڑیں گے تو ق لیگ اگلے الیکشن کیلئے ٹکٹ دے ، حکومت کو پتا ہی نہیں ان کے ساتھ ہو کیا رہا ہے ، کون ان کے ساتھ ہے اور کون نہیں ، اسپیکر شروع میں ہی اجلاس بلا لیتے تو پی ٹی آئی کے باغی ارکان کی تعداد 16 سے اوپر نہ جاتی ۔
جیو نیوز کے ایک ٹی وی پروگرام میں گفتگو کرتے ہوئے انہوں نے کہا کہ پی ٹی آئی کے بہت سے ممبران قومی اسمبلی اب سندھ ہاؤس میں نہیں وہ کسی اور جگہ پر ہیں ، وہ عمران خان کے خلاف ہیں ، میں کوشش کررہا تھا کہ وہ بھی کیمرےپر بات کرلیں لیکن وہ تیار نہیں ہورہے، باقی ممبران کو تحفظ دینے کی کوشش کی جارہی ہے کیوں کہ وہ خوفزدہ نظر آرہے تھے ، اس دفعہ جو سندھ ہاؤس ، چک شہزاد اور ٹیکسلا میں بیٹھے ہیں انہوں نے پیسے کی بجائے بارگین کی ہے کہ وہ اگلے الیکشن میں (ن) لیگ ، پی پی پی ، (ق) لیگ اور جے یو آئی کے ٹکٹ پر الیکشن لڑیں گے ۔

حامد میر نے دعویٰ کیا کہ اگر اسپیکر شروع میں ہی اجلاس بلا لیتے تو میری اطلاع کے مطابق پی ٹی آئی کے باغی ارکان کی تعداد 16 سے اوپر نہ جاتی ، عمران خان کی مخالفین کے خلاف زبان کے بعد ان کے وزرا اندر کچھ اور باہر کچھ کہہ رہے تھے، ان وزرا نے پی پی اور (ن) لیگ سے رابطے شروع کردیے ، اب حالت یہ ہوگئی ہے کہ (ن) لیگ کو سمجھ نہیں آرہی کتنے لوگ ایڈجسٹ کریں جب کہ پنجاب سے کچھ لوگوں نے (ق) لیگ سے رابطہ کرلیا ، کراچی والے پی پی کی طرف جارہے ہیں۔