پشاور ( نیوز ڈیسک) سپریم کورٹ آف پاکستان کی طرف سے قومی اسمبلی کے ڈپٹی اسپیکرقاسم سوری کی رولنگ کالعدم قرار دیے جانے کے بعد پاکستان تحریک انصاف کی جانب سے ردعمل کا سلسلہ جاری ہے۔ تفصیلات کے مطابق صوبہ خیبر پختونخوا میں پی ٹی آئی کے وزیر برائے ہائر ایجوکیشن کامران بنگش کی طرف سے وزیراعظم عمران خان کی ایک تصویر شیئر کی گئی ہے۔
سماجی رابطوں کی ویب سائٹ ٹوئٹر پر جاری کردہ تصویر کے ساتھ اپنے پیغام میں کامران بنگش نے لکھا کہ ایک اور سرپرائز ملے گا برابر ملے گا پھر نہ کہنا خبر نہ ہوئی۔


ادھر سپریم کورٹ کے فیصلے کی روشنی میں حکومت کی حکمت عملی کیا ہوگی ، وزیراعظم عمران خان نے مشاورت کے لیے آج 4 اہم اجلاس بلالیے ، سب سے پہلے وزیراعظم عمران خان کی زیرصدارت تحریک انصاف کی قانونی ٹیم کا اجلاس ہوگا ، جس میں سپریم کورٹ کے فیصلے کا جائزہ لیا جائے گا اور موجودہ صورتحال میں ممکنہ قانونی آپشنز پر غور کیا جائے گا ۔

اس کے بعد وزیراعظم عمران خان کی زیر صدارت وفاقی کابینہ کا خصوصی اجلاس بھی آج ہوگا ، جس میں ملک کی موجودہ سیاسی صورتحال پر غور ہوگا ، اجلاس میں مبینہ غیر ملکی دھمکی آمیز خط کے حوالے سے بھی مشاورت ہوگی اور اجلاس کے دوران آئندہ کے لائحہ عمل پر تبادلہ خیال کیا جائے گی۔ بتایا گیا ہے کہ آج ہی وزیراعظم عمران خان کی زیرصدارت تحریک انصاف کی سیاسی کمیٹی کا اجلاس بھی ہوگا ، اس اجلاس میں بھی موجودہ سیاسی صورتحال پر غور کیا جائے گا ، جہاں وزیراعظم عمران خان آئندہ انتخابات سے متعلق پارٹی رہنماؤں سے مشاورت کریں گے۔
اس کے علاوہ وزیر اعظم عمران خان نے اپنی پارٹی کی پارلیمانی کمیٹی کا اجلاس بھی طلب کیا ہوا ہے ، یہ اجلاس آج دوپہر 3 بجے وزیر اعظم ہاؤس میں ہوگا جب کہ آج شام کے وقت وزیر اعظم عمران خان قوم سے بھی خطاب کریں گے اور موجودہ سیاسی صورتحال سے قوم کو اعتماد میں لیں گے۔ خیال رہے کہ سپریم کورٹ آف پاکستان نے ڈپٹی اسپیکر کی رولنگ پر ازخود نوٹس کیس کا فیصلہ سنا دیا ہے،5 رکنی ججز نے متفقہ فیصلے میں ڈپٹی اسپیکر کی رولنگ کو غیرآئینی اور کالعدم قرار دے دیا ہے، عدالت نے اسمبلی کی تحلیل کو بھی غیرآئینی قرار دیا ہے، وزیراعظم عمران خان، صدرمملکت کو ایڈوائز نہیں کرسکتے تھے۔