اسلام آباد(نیوز ڈیسک) وزیر اعظم شہباز شریف نے چیئرمین پاکستان تحریک انصاف عمران خان کو پاکستان کی تقسیم کے بارے میں بات کرنے پر تنبیہ کرتے ہوئے انہیں عوامی عہدے کے لیے نااہل قرار دے دیا ہے. وزیر اعظم شہباز شریف کی جانب سے یہ ریمارکس ایک ٹوئٹر پوسٹ میں دیے گئے جس میں نجی ٹی وی سے انٹرویو میں عمران کے انٹرویو کا حوالہ دیا گیا مذکورہ انٹرویو میں پی ٹی آئی سربراہ نے اسٹیبلشمنٹ پر زور دیا کہ وہ صحیح فیصلے کریں اور متنبہ کیا کہ اگر پاکستان جوہری صلاحیت کھو دیا تو ملک 3 ٹکڑے ہو جائے گا.

گزشتہ شب نشر ہونے والے انٹرویو میں انہوں نے کہا کہ موجودہ سیاسی صورتحال ملک کے ساتھ ساتھ اسٹیبلشمنٹ کے لیے بھی مسئلہ ہے، اگر اسٹیبلشمنٹ نے درست فیصلے نہیں کیے تو میں لکھ کر دیتا ہوں کہ یہ بھی تباہ ہوں گے اور فوج سب سے پہلے تباہ ہوگی انٹرویو نشر ہونے کے چند گھنٹے بعد وزیر اعظم شہباز شریف نے ٹوئٹر پر ردعمل دیتے ہوئے کہا کہ عمران نیازی ایسے وقت میں ملک کے خلاف دھمکیاں دے رہا جب میں ترکی میں معاہدوں پر دستخط کر رہا ہوں.

انہوں نے کہا کہ اگر کسی بھی ثبوت کی ضرورت تھی کہ نیازی عوامی عہدے کے لیے نااہل ہیں تو ان کا تازہ ترین انٹرویو اس کے لیے کافی ہے انہوں نے چیئرمین پی ٹی آئی کو متنبہ کیا کہ اپنی سیاست کریں لیکن حد سے تجاوز اور پاکستان کی تقسیم کی بات کرنے کی ہمت ہرگز نہ کریں مسلم لیگ (ن) کے ٹوئٹر اکاﺅنٹ سے جاری ایک علیحدہ بیان میں وزیر اعظم کی جانب سے کہا گیا کہ عمران کے ریمارکس اس بات کا ثبوت ہیں کہ پی ٹی آئی کے سربراہ سیاست نہیں، سازش میں ملوث ہیں.
انہوں نے کہا کہ عمران اپنی مایوسی اور بیمار ذہنیت کی وجہ سے افراتفری پھیلا رہے ہیں اور ان کا بیان پاکستان کے دشمنوں سے ملتا جلتا ہے شہباز شریف نے کہا کہ یہ محض بیان نہیں بلکہ ملک میں انتشار اور تقسیم کی آگ بھڑکانے کی سازش ہے انہوں نے مزید کہا کہ اقتدار کھونے کا مطلب یہ نہیں ہے کہ آپ پاکستان اس کے اتحاد اور اس کے اداروں کے خلاف جنگ کریں.
انہوں نے عمران کو خبردار کرتے ہوئے کہا کہ وہ وفاق اور ملکی اداروں پر حملہ نہ کریں، قانون اور آئین کی طے کردہ حدود سے تجاوز نہ کریں وزیر اعظم نے کہا کہ قوم ایسے ناپاک منصوبوں کو کسی قیمت پر قبول نہیں کرے گی اور انہیں کامیاب نہیں ہونے دے گی، انہوں نے ایسے ناپاک اہداف کو شکست دینے کا عزم کیا.

وفاقی وزیر اطلاعات مریم اورنگزیب نے کہا ہے کہ عمران خان کے بیانات آئین کے خلاف اور وفاق پر حملہ ہیں وفاقی وزیر اطلاعات مریم اورنگزیب نے عمران خان کے بیان کی مذمت کرتے ہوئے کہا کہ عمران خان کا بیان آئین اور ملک کے خلاف ہے جبکہ ملک کو ٹکڑے کرنے کی بات کرنا دشمن کی زبان ہے انہوں نے کہا کہ عمران خان کے بیانات آئین کے خلاف ہیں اور وفاق پر حملہ ہے اداروں کی تباہی اور ایٹمی پروگرام چھن جانے کی بات دشمن کرتا ہے.
مریم اورنگزیب نے کہا کہ عمران خان کی اس قسم کی تقریر کو ٹی وی پر نشر نہیں ہونا چاہیے کیونکہ عمران خان کے ملک کے خلاف بیانات پر قوم کا ردعمل روکنا ممکن نہیں ہو گا انہوں نے کہا کہ اقتدار نہ رہے تو آئین، سپریم کورٹ، الیکشن کمیشن اور وفاق پر حملہ بیمار ذہنیت کی عکاسی ہے. قبل ازیں پیپلزپارٹی کے آفیشل ٹوئٹر اکاﺅنٹ پر پارٹی کے شریک چیئرمین آصف علی زرداری کی جانب سے شیئر کیے گئے ایک بیان میں عمران کے ریمارکس کی مذمت کی گئی بیان میں آصف زرداری نے کہا کہ کوئی بھی پاکستان کے ٹکڑے کرنے کی بات نہیں کر سکتا، یہ کسی پاکستانی کی نہیں بلکہ بھارتی وزیر اعظم نریندر مودی کی زبان ہے.


آصف زرداری نے پی ٹی آئی کے سربراہ کو تنقید کا نشانہ بناتے ہوئے کہا عمران خان اس دنیا میں طاقت ہی سب کچھ نہیں ہے، بہادر بنیں اور اپنے پاوں پر کھڑے ہو کر سیاست کرنا سیکھیں انہوں نے مزید کہا کہ اس ملک کو 3 ٹکڑوں میں تقسیم کرنے کی خواہش اس وقت تک پوری نہیں ہو سکتی جب تک ہم اور ہماری آنے والی نسلیں زندہ ہیں.
انہوں نے اپنے بیان کے اختتام پر کہا کہ ان شا اللہ پاکستان قیامت تک قائم رہے گا بیان میں کہا گیا کہ آصف زرداری نے پی پی پی کو عمران خان کے ناپاک بیان پر احتجاج کرنے کی ہدایت کی ہے وزیر ریلوے خواجہ سعد رفیق نے بھی اپنی ٹوئٹس میں عمران خان کے بیان کی مذمت کرتے ہوئے کہا کہ پاکستان کا جوہری پروگرام ان لوگوں کے ہاتھوں میں زیادہ محفوظ ہے جنہوں نے اسے شروع کیا اور جوہری تجربات کیے.
انہوں نے عمران سے مطالبہ کیا کہ وہ وضاحت کریں کہ فوج کو کون سے درست فیصلے کرنے کی ضرورت ہے انہوں نے کہا نااہل تحریک انصاف کی قیادت کی نفرت، انتقام اور تقسیم کی پالیسی نے ملک تباہی کے دھانے پرلا کھڑاکیا، عمران نیازی ذاتی اقتدار کے لیے 2011 سے جمہوریت کے خلاف سازشوں میں مشغول ہیں . انہوں نے کہا کہ عدلیہ اور فوج کو مخاطب کرنے سے پہلے عمران انتشار اور نفرت کا ایجنڈا چھوڑ کر سیاسی برادری کا حصہ بننا سیکھیں، سیاسی جماعتیں جس دن قومی ایجنڈا بنانے کے قابل ہو گئیں، اداروں کی سمت خود بخود متعین ہو جائےگی‘انہوں نے کہا کہ پاکستان ان شا اللّٰہ متحد رہے گا، ملک کو مستحکم رکھنے کیلئے سیاسی قیادت، عدلیہ، افواج اور میڈیا سب کا کردار ا ہم ہے، فوج کو مشورے دینے سے پہلے عمران خان اپنے چال چلن، رویے، زبان اور کردارکی اصلاح کریں.
دریں اثنا وفاقی وزیر منصوبہ بندی و ترقی کے وزیر احسن اقبال نے دعویٰ کیا کہ صحیح فیصلوں سے عمران کا مطلب انہیں وزیراعظم آفس میں واپس لانا ہے انہوں نے اپنی ٹوئٹ میں لکھا کتنی شرم کی بات ہے عمران خان نے اقتدار کھونے کے بدلے اپنا دماغ اور حب الوطنی کھو دی ہے.