اسلام آباد(نیوزڈیسک)چین کے خلائی تربیتی پروگرام میں شامل ہو کر پاکستان نے تاریخ رقم کردی،پاکستان اپنے دو خلا بازوں کو تربیت کےلئے چین بھیجے گا،یہ مشن پاکستان کے سائنس دانوں اور نوجوانوں کیلئے خلا میں قدم رکھنے اور جدید تحقیق کا حصہ بننے کا سنہری موقع ہے،سپارکو نے ملک کے پہلے انسانی خلائی مشن کی تیاری شروع کردی ہے اور سائنس دانوں، محققین اور طلبہ سے تیس اپریل تک جدید سائنسی تجربات کی تجاویز طلب کرلیں،میڈیارپورٹس کے مطابق پاکستان چین کے خالی سٹیشن کے تربیتی پروگرام میں شامل ہونے والا دنیا کا پہلا ملک بن گیا۔
خلائی تحقیق کے سفرمیں پاکستان کی غیرمعمولی اور تاریخی پیش رفت جاری ہے۔یہ تجربات چینی خلائی اسٹیشن سی ایس ایس پر خلا کے سخت ماحول، مائیکرو گریویٹی اور انتہائی درجہ حرارت میں انجام دئیے جائیں گے تاکہ ملک کے پہلے انسانی خلائی مشن کے سائنسی اثرات کو مزید بہتر بنایا جاسکے۔

وزیر اعظم شہباز شریف کی قیادت میں پاکستان نے پاکستانی خلابازوں کو تربیت دینے کیلئے چین کے ساتھ ایک معاہدے پر دستخط کئے جس میں پی ایچ ڈی ہولڈرز، تجربہ کار پائلٹس اور مخصوص جسمانی ضروریات کو پورا کرنے والے گریجویٹس سمیت میرٹ کی بنیاد پر امیدواروں کا انتخاب کیا گیا۔

سپارکو کے ڈائریکٹر شفاعت علی خواہشمند پاکستانی خلابازوں کیلئے ایک سخت تین مراحل پر مشتمل انتخابی عمل کا خاکہ پیش کیا اورکہا کہ چین میں تربیتی پروگرام کیلئے صرف انتہائی قابل امیدواروں کا انتخاب کیا جائے۔ خلابازوں کے انتخاب کا عمل 2026 تک مکمل ہو جائے گا۔ان کا کہنا تھا کہ ہم نے پاکستانی شہریوں کو خلابازوں کی تربیت دینے کیلئے چین کے ساتھ تعاون کیا ہے۔
چین نے ابتدائی طور پر خلابازوں کی تربیت صرف اپنے شہریوں کیلئے مخصوص کی تھی لیکن اب اس نے اس موقع کو پاکستان تک بڑھا دیا ہے جس سے دونوں ممالک کے درمیان زیادہ سے زیادہ تعلقات اور دوستی کو فروغ دیا گیا ہے۔چینی خلائی اسٹیشن سی ایس ایس زمین سے تین سو اسی کلو میٹر بلندی پر بانوے منٹ میں ایک چکر مکمل کرتا ہے اور اس کی رفتار سات اعشاریہ سات کلو میٹر فی سیکنڈ ہے۔