لاہور (نیوزڈیسک) وفاقی وزیر اطلاعات و نشریات عطاءاللہ تارڑ کا کہنا ہے کہ آرمی چیف جنرل سید عاصم منیر نے پاکستان کی ترقی میں بھرپور کردار ادا کیا، معیشت میں بہتری ایک معجزاتی ٹرن اراؤنڈ ہے۔ لاہور میں اپنے حلقہ انتخاب میں ایسٹر کے موقع پر منعقدہ تقریب میں انہوں نے ایسٹر کے موقع پر اپنی پارٹی، مسلم لیگ ن کے قائد محمد نواز شریف، وزیراعظم شہباز شریف، وزیراعلیٰ پنجاب مریم نواز شریف اور حمزہ شہباز شریف کی طرف سے مسیحی برادری کو مبارکباد پیش کی، اس موقع پر اپنے خطاب میں انہوں نے کہا کہ میں ان لوگوں میں موجود ہوں جنہوں نے ناصرف قیام پاکستان بلکہ ملک کی تعمیر و ترقی میں بھی قابل ذکر خدمات سرانجام دی ہیں، 70 ہزار مسیحی ووٹرز کی نمائندگی کرتا ہوں جس پر فخر ہے، مسیحی برادری نے ہمیشہ قومی پرچم میں سفید رنگ کی لاج رکھی، ان کے حقوق کا تحفظ میرا فرض ہے۔
وفاقی وزیر کا کہنا ہے کہ بین المذاہب ہم آہنگی وقت کی ضرورت ہے، ہمیں مشترکہ نکات پر ایک ایسا معاشرہ تشکیل دینا ہے جہاں اخوت، رواداری اور باہمی احترام غالب ہو، مسیحی برادری کی ہر خوشی اور تہوار میں ان کے ساتھ کھڑا ہوں، مسیحی برادری نے پاکستان کے لئے بے پناہ قربانیاں دیں، قومی پرچم میں سفید رنگ کی لاج رکھی، بہترین فائٹر پائلٹس پیدا کئے اور جنگوں میں اپنی جانوں کے نذرانے پیش کیے، مسیحی برادری کا ہمیشہ ملک کے دفاع اور ترقی میں کلیدی کردار رہا ہے۔
اپنے خطاب میں عطا تارڑ نے کہا کہ گزشتہ ایک سال کے دوران ملک معاشی ترقی کی طرف گامزن ہوا ہے، معیشت کی بحالی میں حکومت، وزیراعظم نواز شریف، مریم نواز اور چیف آف آرمی سٹاف جنرل عاصم منیر کی مشترکہ کاوشیں شامل ہیں، آج دنیا بھر کے مالیاتی ادارے پاکستان کی معاشی ترقی کی تعریف کر رہے ہیں اور یہ سب ایک معجزاتی ٹرن اراؤنڈ کی مانند ہے، معیشت بہتر ہو رہی ہے، ہم اڑان پاکستان کی طرف جا رہے ہیں۔