لاہور(نیوزڈیسک) پنجاب اسمبلی میں قائد حزب اختلاف ملک احمد خان بھچر نے کہا ہے کہ مریم نواز نے محرم الحرام میں سبیل کے لئے 20 کروڑ کے اشتہارات لگا دیئے، نظر نیاز کے ڈبوں پر بھی مریم نواز کی تصویر لگائی گئی۔ پریس کلب میں پریس کانفرنس کرتے ہوئے انہوں نے کہا کہ ذہین وزیر اعلی خود سے اپنے بیٹے کا چالان کروا کر نمایاں کر رہی ہیں،اس طرح کے عمل سے گڈ گورننس کو ثابت کرنے کی کوشش کی جارہی ہے ۔
تین دن پہلے محترمہ اسمبلی میں بیان دیتی ہیں کہ ادویات کے لئے کسی کو باہر جانے کی ضرورت نہیں ،محکمہ صحت کا حال پاکپتن دورے میں عوام نے دیکھ لیا ،ہسپتال میں ڈسپرین تک نہیں تھی ،صحت کا شعبہ ٹھیک ہے تو سی ای او اور ایم ایس کو کیوں گرفتار کروانا پڑا؟ رنجیت سنگھ نے چولہا ٹیکس لگایا تھا اور محترمہ نے کوڑا ٹیکس لگا دیا۔

انہوں نے کہا کہ وزیر اعلی پنجاب کی وجہ سے اسمبلی میں انتشار پیدا ہورہا ہے ،ذاتی انا ء کی خاطر وزیر اعلی ارکان کو ڈی سیٹ کروانا چاہتی ہیں،اسمبلی میں احتجاج حکومتی ارکان نے بھی کیا ،ایوان میں احتجاج ہوتے ہیں مگر ڈی سیٹ کا اختیار کسی کے پاس نہیں۔

انہوں نے کہاکہ حکومت کی خواہش ہے اپوزیشن کے بنچز خالی رہیں ،ہم اپنے ساتھیوں کے بغیر ایوان میں نہیں جائیں گے،سپیکر کے ریفرنس کے خلاف عدالت میں جائیں گے،سپیکر بات چیت کے لئے سنجیدہ کوشش کر رہے ہیں تو ہم تیار ہیں،احتجاجی تحریک کا اعلان اسی ہفتے ہو گا ،لاہور سمیت بڑے شہروں سے اس کا آغاز کیا جائے گا ،اب تحریک رکے گی نہیں ،بانی پی ٹی آئی ان کے عصاب پر سوار ہیں۔انہوں نے کہاکہ حکومت بانی پی ٹی آئی اور پی ٹی آئی پر توجہ دینے کی بجائے عوام پر توجہ مرکوز کرے ،کسان کی گندم سستی اور مافیا کی چینی مہنگی ہورہی ہے ۔انہوں نے کہا کہ وزیر اعلی نے محرم الحرام میں سبیل کے لئے بیس کروڑ کے اشتہارات لگا دیئے ،نظر نیاز کے ڈبوں پر مریم نواز کی تصویر لگائی گئی ۔