اسلام آباد (نیوزڈیسک) وفاقی دارالحکومت میں افسوسناک واقعہ پیش آیا ہے جہاں اسلام آباد پولیس کے ایس پی عدیل اکبر نے خود کو گولی مار کر مبینہ طور پر خودکشی کر لی۔ پولیس ذرائع کے مطابق ایس پی عدیل اکبر نے عملے سے پستول لے کر خود کو گولی ماری۔ پولیس ذرائع کے مطابق واقعہ افسرکی رہائش گاہ پر پیش آیا، جس کے بعد انہیں تشویشناک حالت میں قریبی اسپتال منتقل کیا گیا تاہم وہ جانبرنہ ہو سکے۔

ابتدائی طور پرواقعہ کو خودکشی قرار دیا جا رہا ہے، تاہم اصل وجوہات جاننے کے لیے پولیس نے تحقیقات کا آغاز کر دیا ہے۔ جائے وقوعہ کو سیل کرکے شواہد اکٹھے کیے جا رہے ہیں جبکہ ایس پی عدیل اکبرکے ساتھ ڈیوٹی کرنے والے اہلکاروں کو بھی حراست میں لے لیا گیا ہے تاکہ واقعے سے متعلق حقائق سامنے آ سکیں۔ اس حوالے سے ترجمان پولیس سے مؤقف لینے کی کوشش کی جا رہی ہے، تاہم تاحال کوئی باضابطہ بیان جاری نہیں کیا گیا۔ پولیس حکام کا کہنا ہے کہ واقعے کی تفتیش شروع کر دی گئی ہے اور مختلف پہلوؤں سے تحقیقات جاری ہیں۔ ایس پی عدیل اکبر کے خودکشی کی وجوہات فوری طور پر معلوم نہیں ہو سکیں۔