لیسکو کی بجلی چوری اور اووربلنگ روکنے کے لئے کروڑوں روپے کی لاگت سے شروع ہونے والے منصوبہ ناکام ہونے کے خدشات پیدا ہو گئے،ریڈنگ سیکشن کے کے موبائل خراب جبکہ اونچائی پر میٹرز کی تنصیب بھی منصوبے میں آڑے آنے لگی۔

ذرائع کے مطابق لیسکو کا موبائل میٹر ریڈنگ منصوبہ ناکام ہونے کے خدشات پیدا ہو گئے ہیں،دو سال قبل کمپنی نے بجلی چوری اور اووربلنگ روکنے کے لئے منصوبہ بنایا تھا،موبائل فونز خراب ہونے کی وجہ سے میٹر ریڈنگ لینے میں مشکلات درپیش ہیں، موبائل خراب ہونے کی وجہ سے میٹر ریڈر ذاتی موبائل استعمال کرنے پر مجبور ہیں۔

ذرائع نے بتایا کہ آپریشن ونگ کے افسران نے موبائل فونز خراب ہونے پر اعلیٰ افسران کو مراسلہ ارسال کر دیا ہے جس میں واضح کیا گیا ہے کہ موبائل فونز کو فوری تبدیل کرنے کی ضرورت ہے، اس کیساتھ ساتھ زیادہ اونچائی پر نصب میٹرز بھی منصوبے میں آڑے آنے لگے ہیں،اونچائی زیادہ ہونے سے تصویر لینے میں دشواری کا سامنا ہے، مشکلات کے باوجود میٹرز کی مناسب جگہ پر تنصیب کے لئے اقدامات نہ کئے جا سکے۔